Намеснік дэпартаменту ў пытаннях нераспаўсюду і кантролю над узбраеннямі МЗС РФ Канстанцін Варанцоў падчас паседжання Першага камітэту раззбраення Генеральнай асамблеі ААН заявіў, што вывад расейскай ядравай зброі з Беларусі немагчымы без «адмовы ЗША і NATO ад курсу на падрыў бяспекі Расеі», піша ТАСС.
Пад падрывам бяспекі Расеі мелася на ўвазе наяўнасць ядравай зброі ЗША ў Еўропе.
«Пастаноўка пытання пра перагляд супольна прынятых Расеяй і Беларуссю рашэнняў у ядравай галіне цалкам нерэалістычная без адмовы ЗША і NATO ад шкоднага курсу на мэтанакіраваны падрыў нашай бяспекі і без поўнага вываду з Еўропы амерыканскай ядравай зброі з ліквідацыяй адпаведнай інфраструктуры», – сказаў Варанцоў.
Расейскі чыноўнік зазначыў: размяшчэнне расейскай ядравай зброі ў Беларусі не можа разглядацца як парушэнне бяз’ядравага статусу нашай краіны, бо поўны кантроль за ядраваю зброяй належыць Расейскай Федэрацыі.
Пра размяшчэнне расейскай ядравай зброі ў Беларусі Уладзімір Пуцін заявіў 25 сакавіка 2023 года. 16 чэрвеня ён паведаміў, што першыя тактычныя ядравыя снарады дастаўленыя ў Беларусь і да канца 2023 года будзе размешчаная ўся запланаваная колькасць зброі. 27 чэрвеня Лукашэнка пацвердзіў, што частка расейскай ядравай зброі ўжо ў Беларусі.
У верасні пачаўся чарговы этап дастаўкі кампанентаў расейскай ядравай зброі ў Беларусь, паведамляла супольнасць беларускіх чыгуначнікаў.
Падчас выступу на пленарнай сесіі штогадовага пасяджэння дыскусійнага клубу «Валдай» 5 кастрычніка Уладзімір Пуцін дапусціў магчымасць адклікання Расеяй ратыфікацыі Дамовы аб усёахопнай забароне ядравых выпрабаванняў (ДУЗЯВ), а таксама заявіў пра паспяховае выпрабаванне міжкантынентальнай ракеты з ядраваю сісэмаю «Буравеснік».
Марыя Міхалевіч belsat.eu