Франак Вячорка: з дакументаў Еўразвязу аб візавых абмежаваннях афіцыйна выключылі беларусаў

Дарадца Святланы Ціханоўскай Франак Вячорка 6 верасня напісаў на сваёй старонцы ў «Фэйсбуку», што «афіцыйна з дакументаў аб адмене спрошчанага візавага рэжыму і візавых абмежаваннях выключана згадка беларусаў».

31 жніўня ў Празе з удзелам міністраў замежных справаў краінаў ЕЗ, украінскага міністра Дмытра Кулэбы і вярхоўнага прадстаўніка ЕЗ Жузэпа Бурэля прайшоў Форум для Украіны. Тады ж стала вядома, што Еўразвяз прыпыніў пагадненне аб спрошчаным візавым рэжыме з Расеяй.

Міністр замежных справаў Вугоршчыны Петэр Сіярта (Péter Szijjártó) заявіў, што большасць краінаў ЕЗ падтрымалі прыпыненне пагаднення, якое спрашчае выдаванне візаў расейцам.

Сярод краінаў Аб’яднанай Еўропы Польшча, Чэхія, Літва, Латвія і Эстонія выступаюць за поўную забарону турызму для грамадзянаў Расеі. Нямеччына і Францыя, у сваю чаргу, заяўляюць, што такая захада контрпрадуктыўная, бо простым расейцам усё роўна трэба дазволіць доступ на Захад.

Адначасова камісарка Рады Еўропы ў правах чалавека Дуня Міятавіч (Dunja Mijatović) заклікала краіны – чальцы арганізацыі не ўскладняць атрыманне візаў і легалізацыю для грамадскіх актывістаў і праваабаронцаў з Беларусі і Расеі.

На Форуме для Украіны прысутнічаў Франак Вячорка. Ён паведаміў, што паводле папярэдняй дамоўленасці візавых санкцыяў супраць беларусаў Еўразвяз уводзіць не збіраецца.

Марыя Міхалевіч belsat.eu