Кіраўнік польскага знешнепалітычнага ведамства Гжэгож Схетына ў інтэрв‘ю тэлеканалу «TVP Info» заявіў, што Расею чакае ўзмацненне санкцыяў.
«Расея павінна зразумець, што сутыкаецца з адзінай пазіцыяй усяго свету (адносна канфлікту на ўсходзе Украіны – belsat.eu)….Еўразвяз не можа змірыцца з тым, што адбылося ў Марыупалі», – падкрэсліў польскі дыпламат.
Кіраўнік МЗС Польшчы таксама звярнуў увагу на цяжкасці, звязаныя з пашырэннем санкцыяў супраць Расеі, якая падтрымлівае прарасейскіх баевікоў на Данбасе.
«Не так проста аб’яднаць пазіцыі 28 краінаў ЕЗ», – сказаў Гжэгож Схетына.
24 студзеня кіраўнік еўрапейскай дыпламатыі Федэрыка Магерыні заявіла, што эскалацыя канфлікту пагаршае адносіны на лініі Масква – Брусель.
Чарговае абмеркаванне пытання пашырэння санкцыяў на ўзроўні міністраў замежных спраў ЕЗ мае адбыцца 29 студзеня.
28 студзеня Расея была пазбаўлена права голасу ў Парламенцкай асамблеі рады Еўропы да красавіка.
У адказ на гэта верхняя палата Дзяржаўнай думы Расеі выступіла за прыпыненне супрацы з «гэтай арганізацыяй, якая імкліва губляе аўтарытэт», – паведамляе Ria.ru.
ЮВ, belsat.eu
