Тытулам «тэлевізійнай асобы года» канал надзяліў сёлета адразу дваіх журналістаў. Яшчэ дзве асобы атрымалі адмысловую ўзнагароду ад дырэктаркі тэлеканалу Агнешкі Рамашэўскай.
«Белсат» у шырокім разуменні – гэта ўнікальны ў свеце прыклад салідарнасці паміж народамі, грамадствамі, – падкрэсліла спадарыня Агнешка Рамашэўская з нагоды 7-га Дня нараджэння незалежнага тэлебачання. – Унікальны, між іншым, і таму, што гэта нізавая ініцыятыва, створаная не дзяржавай ці нейкай карпарацыяй, але журналістамі па абодва бакі мяжы. «Белсат» нарадзіўся не з прагі прыбытку і не з палітычнага разліку, а дзякуючы аўтэнтычнай людской салідарнасці».
Паводле кіраўніцы тэлеканалу, стратэгічная мэта «Белсату» – гэта перанос рэдакцыі ў Менск: «Тады нашая місія будзе выкананая, хоць, магчыма, не завершаная. Але мы да гэтага імкнёмся і дзеля гэтага працуем».
Ужо другі год запар «Белсат» вылучае найлепшае, што было створана журналістамі тэлеканалу цягам апошняга года, і прызнае ўзнагароды ў адмысловых намінацыях. Самае цікавае і годнае на «Белсаце» абірае журы, у склад якога ўваходзіць кіраўніцтва тэлеканалу ды прадстаўнікі беларускай інтэлігенцыі з назіральнай рады тэлеканалу. Мэта конкурсу – пашырэнне найлепшых журналісцкіх стандартаў у беларускай медыйнай прасторы.
Сёлета падчас святкавання 7-га Дня народзінаў «Белсату» ў Варшаве і Менску былі названыя тыя, кім ганарыцца незалежнае тэлебачанне.
Тытул «тэлевізійнай асобы года» сёлета атрымалі два чалавекі: прадстаўнік варшаўскай часткі «Белсату», вядоўца інфармацыйна-публіцыстынага блоку «Студыя «Белсат» Валеры Руселік ды відэааператар і журналіст з Менску Аляксандр Баразенка, які з пачатку ўкраінскіх падзеяў працаваў на Майдане, а потым на ўсходзе Украіны. Летась пераможцаю ў гэтай катэгорыі стала Святлана Калінкіна, вядоўца ды суаўтарка праграмы «Размова дня».
[vc_single_image image=”3″ img_size=”large”]
Спецыяльную ўзнагароду ад дырэктара тэлеканалу Агнешкі Рамашэўскай атрымалі аўтары цыклу рэпартажаў з Украіны Юрась Высоцкі і Сяргей Марчык. У студзені 2014 года яны былі траўмаваныя ўкраінскімі сілавікамі падчас разгону Еўрамайдану ў Чаркасах.
[vc_single_image image=”5″ img_size=”large”]
Найлепшым дакументальным фільмам апошняга года прызнана стужка Віктара Корзуна «Амерыканка. All included». Фільм распавядае пра побыт у турме КДБ, у гэтак званай «амерыканцы», вядомага журналіста і пісьменніка Аляксандра Фядуты. Аўтар правёў у зняволенні 110 дзён пасля прэзідэнцкіх выбараў 2010 года і апісаў гэта ў кнізе. Ідэя фільму – перакласці несуцяшальную рэчаіснасць на мову літаратуры, змяніўшы жанр з драмы на камедыю.
Найлепшае выданне публіцыстычнай праграмы ў 2014 годзе – гэта «Людскія справы: Карупцыя ў ЖКГ» Алеся Залеўскага. Менавіта праз гэтую праграму, у якой вядоўца выкрывае адну са схемаў крадзяжоў у ЖКГ, аўтара праграмы пакаралі штрафам у Br 6 млн, абвінаваціўшы ў «нелегальным вырабе і распаўсюдзе прадукцыі СМІ».
«Рэпартажам 2014 года» названы сюжэт «Вакол свету моўчкі» Кацярыны Севасцянавай. Герой рэпартажу – 73-гадовы матацыкліст Уладзімір Ярэц. Глуханямы, ён здолеў атрымаць правы і здзейсніць шматлікія падарожжы па ўсім свеце, пабываўшы ў 138 краінах.
За найлепшыя інфармацыйныя матэрыялы года ўзнагароды атрымалі:
- аўтар матэрыялаў «Два крокі да вайны» і «Беларусы едуць на вайну» Яраслаў Сцешык;
- аўтар шэрагу матэрыялаў пра гарачыя падзеі ва Украіне Аляксандр Баразенка;
- аўтар шэрагу сюжэтаў з Украіны Аркадзь Несцярэнка;
- аўтар шэрагу матэрыялаў з Украіны Усевалад Шлыкаў.
Найлепшым артыкулам года, якія з’явіўся на інтэрнэт-старонцы тэлеканалу Belsat.eu, названа «Размова з былым ваенным камендантам Грознага Ісой Мунаевым, які ваюе супраць расейцаў на Данбасе» Аркадзя Несцярэнкі.
За найбольш папулярны ў інтэрнэце відэасюжэт «Белсату» – «Як адбіралі сцягі на канцэрце «Океана Эльзи» – узнагароду атрымалі яго аўтары – Аляксандр Баразенка і Сяргей Кавалёў.
Віншуем нашых пераможцаў!
Максім Ярашэвіч, belsat.eu
