Лукашэнка крытыкуе дзеянні ўраду, які сам прызначыў ды абяцае, што «штучнага падвышэння» коштаў на паліва не будзе. Бо падняць кошты «і дурань можа».
Падчас нарады з Урадам і Нацбанкам кіраўнік краіны закрануў балючую не толькі для аўтамабілістаў, але і для бюджэту краіны тэму коштаў на паліва. Урад запрапанаваў у чарговы раз падняць кошты на паліва, каб падтрымаць беларускія нафтаперапрацоўчыя прадпрыемствы.
З рапартаў афіцыйных медыяў вынікае, што ў НПЗ могуць узнікнуць фінансавыя праблемы праз расейскія махінацыі з падаткамі і мытамі, у выніку якіх кошты нафты для Беларусі павысяцца на $ 100. І менавіта ўнутраны спажывец ізноў меўся б кампенсаваць гэтыя страты.
«Няхай шукаюць гэтыя грошы на НПЗ і на продажах на вонкавым рынку. Трэба гэтыя рычагі задзейнічаць, а не простыя: узялі кошты і паднялі. Гэта і дурань можа» Дзеля гэтага і ўраду не трэба!» – публічна абураўся Аляксандр Лукашэнка на прапанову павысіць кошты на бензін.
Зрэшты, ад самага пачатку прызначэння кіраўніком ураду Міхаіла Мясніковіча (напрыканцы 2010), кошты на бензін толькі і раслі. Хай і кожны раз з рознымі апраўданнямі: са спасылкаю на сусветныя кошты на нафту, на неабходнасць павысіць канкурэнтаздольнасць НПЗ, на кошты на бензін у суседніх краінах.
[vc_single_image image=”3″ img_size=”large”]
Кошты на бензін у Беларусі за апошнія гады змяншаліся толькі аднойчы – у выніку шумных пратэстаў «Стоп-бензін», калі аўтамабілісты змусілі ўмяшацца Аляксандра Лукашэнку.
Калі ж сусветныя кошты на нафту альбо на паліва ў суседніх краінах падае, «Белнафтахім» спрабуе гэтага не заўважаць. Цяпер кошт на бензін прывязалі да курсу долара. Хоць заробкі беларусаў да «зялёнага» не прывязаны.
МЛ, belsat.eu
