Як паведаміла актывістка ініцыятыўнай групы жыхароў мікрараёну Валянціна Малюціна, каля 200 подпісаў было сабрана толькі 17 сакавіка на сходзе жыхароў Уручча, які адбыўся на тэрыторыі будаўніцтва першага 16-павярховага дому на вул. Русіянава.
Першыя 1400 подпісаў пад зваротам да прэзідэнта, ураду і кіраўніка Менгарвыканкаму былі перададзеныя 7 сакавіка. Але адказу з названых інстанцыяў не было, і збор подпісаў працягваецца. Жыхары перакананыя, што новае будаўніцтва прывядзе да празмерна шчыльнай забудовы, а таксама пазбавіць іх зялёнай зоны і дзіцячых пляцовак. Барацьба жыхароў супраць будаўніцтва новых дамоў вядзецца з 2005 г.
Між тым, паводле Малюцінай, сітуацыя штодня становіцца ўсё больш напружаная. “Улады пачалі актыўна і арганізавана захопліваць нашу тэрыторыю. Дарога, па якой большасць жыхароў мікрараёну ішлі на працу, цяпер перакрытая плотам будпляцоўкі”, – распавяла актывістка.
На сход жыхароў у мінулую суботу, апавядае Валянціна Малюціна, былі пісьмова запрошаныя кіраўнік Менгарвыканкаму Мікалай Ладуцька і кіраўнік адміністрацыі Першамайскага раёну Ігар Кудрэвіч. “Кудрэвіч спачатку адказаў, што ніхто не прыйдзе, а калі хтосьці пачне збірацца, то яны знойдуць сілы адказаць. Гэта была своеасаблівая пагроза”, – падкрэсліла актывістка.
“Мы пакуль не ведаем, што рабіць далей. Нам пагражаюць міліцыяй: з Кудрэвічам прыязджаў намеснік начальніка ГУУС Менгарвыканкаму Ігар Яўсееў”, – дадала актывістка.
belsat.eu