У Нацыянальным гістарычным музеі Беларусі адбылася прэзентацыя рэканструкцыяў гістарычных постацяў Вялікага князя літоўскага Вітаўта і польскага караля Ягайлы.
Рэканструкцыі постацяў уяўляюць з сябе партрэтныя скульптуры, выкананыя ў поўны рост. Вонкавы вобраз дзяржаўных дзеячаў адноўлены на падставе дасканалага вывучэння гістарычных крыніцаў ды іканаграфіі. Гэтак, вобраз Вітаўта адноўлены на падставе выявы з асабістай пячаткі князя, мініяцюры на прастоле пачатку XVI ст. і гравюры з кнігі Гванніні 1578 г. За аснову партрэтнага вобразу Ягайлы ўзялі пластыку надмагілля караля, а касцюм узноўлены дзякуючы выяве з абраза «Пакланенне трох каралёў».
Рэканструкцыю выканалі сябры Беларускага саюзу мастакоў Павел Лук і Юрый Піскун.
«Апошнія дзесяцігоддзі паказалі, – адзначыў падчас прэзентацыі дырэктар музею Сяргей Вечар, – што наша гісторыя багатая, разнастайная, цікавая вельмі адметнымі персанажамі. Сярод гэтых герояў айчыннай гісторыі – і славутыя імёны Вітаўта ды Ягайлы. Мы працуем над будучай гістарычнай экспазіцыяй, у якой гэтыя постаці павінны заняць сваё годнае месца».
Скульптар Павел Лук падзяліўся тым, як ішла праца над рэканструкцыяй: «Ёсць апісанні, напрыклад Яна Длугаша (сярэднявечны польскі гісторык, аўтар 12-томнай «Гісторыі Польшчы»), Ягайлы, ёсць гравюры, пячаткі абедзвюх асобаў. Тое, што яны былі стрыечнымі братамі, наводзіла на думку пра іхнае пэўнае падабенства. Але, вядома, кожны мастак стварае свой вобраз».
belsat.eu