Палітзняволеная гомельская журналістка Ларыса Шчыракова сустрэлася з сынам у СІЗА
Гомельскай журналістцы і краязнаўцы Ларысе Шчыраковай 30 траўня дазволілі кароткатэрміновае спатканне з роднымі, на якое хадзіў і ейны шаснаццацігадовы сын Святаслаў, паведамляе Беларуская асацыяцыя журналістаў.
Маці з сынам пабачыліся ўпершыню з дня затрымання 6 снежня 2022 года. На пачатку сустрэчы Ларыса расплакалася, але потым справілася з эмоцыямі і нават жартавала. Размова праходзіла па тэлефоне праз шкло цягам дзвюх гадзінаў.
Следства ў дачыненні Ларысы Шчыраковай скончылася, крымінальную справу паводле арт. 369-1 КК РБ («Дыскрэдытацыя Рэспублікі Беларусь») накіравалі ў суд. У чым канкрэтна абвінавачваюць журналістыку – невядома. Адвакат даў падпіску аб неразгалошванні.
Ларысу Шчыракову затрымалі 6 снежня 2022 года пасля ператрусу ў доме. Ейнага няпоўнагадовага сына Святаслава міліцыя перадала ў сацыяльны прытулак. Забраў з прытулку падлетка бацька, які па выкліку сваякоў адмыслова прыехаў у Гомель з Новасібірску, дзе жыў асобна каля дзесяці апошніх гадоў.
Ларыса Шчыракова адышла ад журналістыкі яшчэ ў 2021 годзе, пра што заявіла публічна. Яна зарэгістравалася індывідуальнай прадпрымальніцай, здымала этнафотасесіі ў нацыянальных строях з уласнай калекцыі, пайшла вучыцца на псіхолага.
Марыя Міхалевіч belsat.eu
