У Еўрапейскім гуманітарным універсітэце прайшло адзінаццатае ўручэнне ўзнагароды выбітным выпускнікам. Сёлета выбітнай выпускніцай прызнана завочна палітзняволеная праваабаронца Наста Лойка. Аб гэтым паведамляе «Вясна».
29 чэрвеня ў Еўрапейскім гуманітарным універсітэце ў 11-ы раз уручылі ўзнагароду «Выбітнай выпускніцы». Сёлета ў намінацыі перамагла палітзняволеная Наста Лойка, 20 чэрвеня асуджаная за праваабарончы даклад да сямі гадоў зняволення ў калоніі. У гонар Насты ва ўніверсітэце будзе ўстаноўлена імянная таблічка. Трэці год запар узнагарода прызначаецца палітзняволеным.
Паколькі Наста знаходзіцца ў вязніцы, то ганаровы сертыфікат ад яе імя прыняла ейная сяброўка, магістрантка ЕГУ Ксенія Малюкова. Яна выступіла з прамовай, у якой узгадала іншых палітзняволеных, якія атрымалі такую ўзнагароду ЕГУ ў папярэднія гады.
Ксенія падзякавала ўсім, хто намінаваў і галасаваў за мужную праваабаронцу, і адзначыла, што Наста – бясспрэчна жанчына-легенда. Але калі б тое было магчыма, то сяброўка памяняла б усе прэміі свету на свабоду Насты Лойкі.
«Хай хутчэй наступіць лепшы час, у якім не будзе навін, у якіх паміраюць мігранты з Сірыі, Афганістану, Ірану, Іраку, Чачэніі, спрабуючы перабрацца праз памежныя барʼеры. Свабоду ўсім зняволеным па палітычных матывах у свеце!» – сказала Ксенія Малюкова.
Раней «Белсат» паведамляў, што ў Менскім гарадскім судзе 20 чэрвеня 2023 года вынеслі прысуд па справе палітзняволенай праваабаронцы Насты Лойкі. Ёй прысудзілі 7 гадоў калоніі паводле ч. 3 арт. 130 КК («Распальванне сацыяльнай варожасці») за падрыхтоўку даклада «Пераслед анархістаў, антыфашыстаў, левых і сацыяльных актывістаў у Беларусі» (2017-жнівень 2018 года). У ім нібыта даецца крытычная ацэнка дзейнасці супрацоўнікаў міліцыі. Суд праходзіў у закрытым рэжыме, таму падрабязнасці і пазіцыя самой Насты невядомыя. Прысуд вынесла Алена Шылько, дзяржаўнае абвінавачванне падтрымлівала Вольга Дзіндзелевіч.
Антон Тачняк belsat.eu