Дэлегацыя міністраў з непрызнанай Абхазіі 27 кастрычніка правяла сустрэчу з уладамі Беларусі, паведамляе прэс-служба МЗС Абхазіі.
Дэлегацыя прыбыла ў Менск для правядзення двухбаковых міжведамасных кансультацый. Прадстаўнікі Абхазіі сустрэліся з кіраўніком апарата Савету міністраў Беларусі Канстанцінам Буракам і паслом Расеі ў Беларусі Барысам Грызловым.
У дэлегацыю непрызнанай рэспублікі ўвайшлі:
- міністр замежных спраў Інал Ардзінба;
- міністр унутраных спраў Роберт Кіут;
- міністр аховы здароўя Эдуард Бутба;
- выконваючы абавязкі міністра культуры Дынара Смыр;
- міністр па надзвычайных сітуацыях Леў Квіцынія;
- кіраўнік адміністрацыі Сухума Беслан Эшба;
- старшыня Дзяржкамітэта па справах моладзі і спорту Тарас Хагба.
«Мы ствараем сур’ёзны фундамент для развіцця міждзяржаўных адносін з Беларуссю», – заявіў кіраўнік МЗС Абхазіі Інал Ардзінба.
Нагадаем, у Менску 20 лютага Аляксандр Лукашэнка сустракаўся з кіраўніком непрызнанай Абхазіі Асланам Бжанія. На сустрэчы абмяркоўваліся пытанні супрацы Беларусі і самаабвешчанай рэспублікі. «Грубае парушэнне суверэнітэту і тэрытарыяльнай цэласнасці Грузіі», – так афіцыйны Тбілісі ацаніў сустрэчу Лукашэнкі з кіраўніцтвам непрызнанай рэспублікі Абхазія, якую Грузія лічыць акупаванаю.
У канцы верасня 2022 года Аляксандр Лукашэнка раптоўна паляцеў у Абхазію, пагасцяваў, з’ехаў. Адметна, што непрызнаную рэспубліку ён тады наведаў упершыню.
Алена Рувіна belsat.eu
