Мытнікі дарожнага паста «Райгардас» спынілі аўтамабіль з Беларусі, у якім было схавана 453 пачкі кантрабандных цыгарэтаў. Корпус аўта быў літаральна нашпігаваны ўпакоўкамі, таму машыну разрэзалі.
Беларус заявіў, што нічога забароненага або тавараў, якія абкладаюцца падаткам, не вязе.
«Кантрабандавыя цыгарэты былі выяўленыя падчас мытнага надгляду ў розных месцах аўтамабіля: пад пярэднімі і заднімі крыламі, на пярэдніх ліхтарах і на парогах. Выяўленне спецыяльна абсталяваных схованак у завадскіх паражнінах аўтамабіля прымусіла мытнікаў ужыць і больш сур’ёзныя інструменты. Пасля разразання крылаў і парогаў аўтамабіля ў адной з паражнінаў было выяўлена 453 пачкі цыгарэтаў “NZ”, “Minsk” і “Queen Menthol”», – піша літоўская мытня.
Цыгарэты і аўтамабіль затрымалі, а на мужчыну склалі пратакол аб адміністратыўным правапарушэнні. Яму пагражае штраф, канфіскацыя кантрабанды і аўтамабіля.
Арсен Рудэнка belsat.eu
