Палітзняволеную Ларысу Шчыракову будуць судзіць за працу з «Вясной» і «Белсатам»
У Генеральнай пракуратуры пацвердзілі, што следства ў справе палітзняволенай гомельскай журналісткі Ларысы Шчыраковай завершанае, справа перададзеная ў суд, і найбліжэйшым часам адбудзецца судовае паседжанне. Працэс пройдзе ў Гомельскім абласным судзе.
На Ларысу Шчыракову завялі крымінальную справу паводле артыкулу аб распаўсюджванні заведама ілжывых звестак, якія дыскрэдытуюць Рэспубліку Беларусь у інтэрнэце (арт. 369-1, ч. 1), а таксама ў садзейнічанні экстрэмісцкай дзейнасці (ч. 2 арт. 361-4 КК).
Паводле версіі пракуратуры, абвінавачаная са жніўня 2020 года да снежня 2022 года прадаставіла для размяшчэння і размясціла ў інтэрнэце «інфармацыйныя матэрыялы з загадзя ілжывымі звесткамі, якія дыскрэдытавалі Рэспубліку Беларусь». Таксама яна «ажыццяўляла збор, стварэнне, апрацоўванне, захоўванне і перадачу аўдыё-, відэа-, фота- і тэкставай інфармацыі, для далейшага выкарыстання ў мэтах забеспячэння экстрэмісцкай дзейнасці інфармацыйнага рэсурсу «Вясна» і экстрэмісцкага фармавання «Белсат», сказана ў паведамленні Генпракуратуры.
Шчыракову затрымалі ў Гомлі 6 снежня 2022 года. Пасля гэтага ейнага 16-гадовага сына Святаслава міліцыя перадала ў «сацыяльна-педагагічны цэнтр». Хлопца сваякам не аддавалі, спасылаючыся на тое, што чакаюць «законнага прадстаўніка» – бацьку, які жыве ў Навасібірску. Пазней падлетка ўсё ж забраў бацька, які адмыслова прыляцеў з Расеі.
Да 2021 года Шчыракова супрацоўнічала з шэрагам незалежных выданняў. Раней палітзняволеная ўзначальвала краязнаўчую арганізацыю «Талака», якую ўлады зліквідавалі. Дзякуючы Ларысе Шчыраковай шмат хто зацікавіўся беларускай культурай: яна ладзіла святы Купалле, Жаньцібу Цярэшкі, Каляды, іншыя імпрэзы. На ейнае запрашэнне ў 2000-я гады ў Гомель прыязджалі вядомыя гісторыкі і краязнаўцы. У 2018 годзе яна стварыла ток-пляцоўку «Медыяпрастора», дзе праходзілі трэнінгі для журналістаў. Зняла шэраг дакументальных фільмаў.
Са жніўня 2020 года Ларысу неаднаразова затрымлівалі і судзілі паводле адміністратыўных артыкулаў. З пачатку 2021 года ў яе дома прайшло не менш за чатыры ператрусы. Пасля чарговага ператрусу і допыту ў лютым мінулага года на сваёй старонцы ў Facebook яна напісала, што пакідае журналістыку.
Алена Рувіна belsat.eu
