Вайскоўцы распачалі «сезонныя работы ў добраўпарадкаванні аб’ектаў, дзе раней базаваліся падраздзяленні ракетных войскаў стратэгічнага прызначэння». У паведамленні Мінабароны адзначаецца, што на гэтых пазіцыях некалі стаяў ракетны комплекс «Таполя».
Асабовы склад займаецца «добраўпарадкаваннем тэрыторыі пасля зімовага перыяду», а таксама ладзіць «іншыя мерапрыемствы, накіраваныя на падтрыманне інфраструктуры ў належным стане».
«Раней баявыя стартавыя пазіцыі выкарыстоўваліся для размяшчэння рухомага грунтавога ракетнага комплексу «Таполя», – паведамляе міністэрства абароны.
На відэа, якое распаўсюдзіла ведамства, неназваны вайсковец у балаклаве заявіў:
«Што да магчымасці выкарыстання аб’ектаў стратэгічнага прызначэння, якія захаваліся ў спадчыну з часоў Савецкага Саюзу, можна з упэўненасцю сказаць, што пры неабходнасці яны аператыўна могуць быць падрыхтаваныя да ўжывання».
Дзе менавіта трывае «суботнік», не ўдакладняецца. Аднак на відэа паказалі табліцу «Здесь с 1961 по 1994 гг. несли боевое дежурство 56-й ракетный полк и 1692 ремонтно-техническая база РВСН». Вядома, што гэты полк знаходзіўся ля вёскі Шарашова пад Пружанамі. Тры гады таму праект «Meridian28» паказаў, у якім стане цяпер гэты аб’ект.
«Таполя» – грунтавы комплекс стратэгічнага прызначэння з міжкантынентальнымі балістычнымі ракетамі.
Сяргей Крот belsat.eu