Сын палітыка Анатоля Лябедзькі падчас судовага працэсу заявіў, што не разумее сутнасці выстаўленага абвінавачвання. Пры гэтым палітычны вязень пагадзіўся адказваць на пытанні пракурора, перадае БелТА.
Арцёма Лябедзьку вінавацяць паводле артыкулу аб фінансаванні дзейнасці экстрэмісцкага фармавання. У матэрыялах справы пазначана, што фігурант нібыта пераводзіў грошы тром арганізацыям са свайго банкаўскага рахунку і з дапамогаю мабільнай праграмы. Акрамя таго, як сцвярджае следства, былі плацяжы праз нутраную сістэму Facebook.
Палітычны вязень заявіў, што сутнасці абвінавачвання не разумее, аднак не адмовіўся адказваць на пытанні пракурора.
Працэс вядзе суддзя Яўген Пісарэвіч.
Арцёма Лябедзьку затрымалі ў сакавіку. Двойчы яму прызначылі 15 содняў арышту, а пасля выставілі абвінавачванне паводле крымінальнага артыкулу.
Праваабаронцы прызналі мужчыну палітзняволеным.
Сяргей Крот belsat.eu
