Да гэтага часу звесткі аб куплі замежнай валюты адносіліся да банкаўскай таямніцы фізічных асобаў. Запланаваныя змяненні ў заканадаўства звязаныя з неабходнасцю ўстанаўлення асобаў, чые фактычныя расходы перавышаюць афіцыйныя даходы. У дзяржорганах, у прыватнасці, адзначаюць, што ёсць выпадкі, калі людзі пенсійнага ўзросту купляюць буйныя сумы замежнай валюты.
Прадстаўнікі фінансавага сектара звязваюць факты набыцця насельніцтвам буйных сум замежнай валюты з дзейнасцю камерцыйных арганізацыяў і прадпрымальнікаў, якія выкарыстоўваюць фізічных асобаў у якасці пасрэднікаў.
Прадстаўнікі банкаўскага сектару мяркуюць, што падатковы кантроль за купляй замежнай валюты можа быць накіраваны супраць асобаў, якія ўтойваюць ценявыя даходы.
У 2013 годзе ў Беларусі актывізавалася барацьба дзяржавы з асобамі, якія жывуць “не па сродках” (чые фактычныя расходы перавышаюць афіцыйныя даходы). У прыватнасці, летась былі ініцыяваныя змяненні ў Падатковы кодэкс, якія абавязалі банкі з 2014 года падаваць на запыт падатковых органаў звесткі аб крэдытах і дэпазітах фізічных асобаў.
У абгрунтаванні да закону аб унясенні змяненняў у Падатковы кодэкс указвалася, што фізічныя асобы з мэтай легалізацыі “ценявых даходаў” бралі кароткатэрміновы крэдыт у банку і тым самым аргументавалі падатковай інспекцыі наяўнасць грашовых сродкаў на куплю дарагіх рэчаў. З мэтаю выяўлення такіх схемаў былі ініцыяваныя змены ў заканадаўства, якія надалі падатковым органам права атрымліваць звесткі пра крэдыты і дэпазіты фізічных асобаў.
Акрамя таго, у 2013 годзе на ўрадавым узроўні прапаноўвалася ўвесці «падатак на дармаедаў», якіх улады падазраюць у ажыццяўленні незаконнай прадпрымальніцкай дзейнасці. Разам з тым, як патлумачыла на мінулым тыдні Міністэрства фінансаў, да гэтага часу не ўстаноўлены механізм вызначэння “дармаедаў”.
МЛ / Дзмітрый Заяц, БелаПАН.