Суды над беларусамі і арышты тых, хто вярнуўся з-за мяжы. Хроніка пераследу за 19 снежня
Штодня ў Беларусі з 2020 году працягваюцца рэпрэсіі супраць грамадзянаў краіны. «Белсат» сабраў вядомыя факты пераследу 19 снежня.
У Слоніме затрымалі вядомага журналіста і пісьменніка Сяргея Чыгрына. Журналіста судзілі за рэпост «экстрэмісцкіх матэрыялаў» і арыштавалі на 7 содняў. Калегі звязваюць затрыманне Сяргея Чыгрына з ягонай ранейшай працай у недзяржаўных медыях.
28 снежня ў Гомельскім абласным судзе пачнуць судзіць Таццяну Курыліну, якая вярнулася ў Беларусь пасля абяцанняў невядомага мужчыны «развязаць усе пытанні». Выявілася, што гэта была аперацыя КДБ. Як паведамляе праваабарончы цэнтр «Вясна», актывістку вінавацяць паводле 12 артыкулаў.
Таксама сілавікі схапілі сямейную пару, якая вярнулася ў Беларусь на лячэнне. Затрымалі іх за ўдзел у пратэстах 2020 года, дзейнасць «у складзе дыяспар» і негатыўныя каментары ў інтэрнэце.
У Докшыцах асудзілі 19-гадовага Аляксандра Сініцу, якога прызналі вінаватым паводле арт. 341 («Апаганьванне будынкаў і псаванне маёмасці»). Юнак напісаў на краме ў Докшыцах 3 %, за гэта яму прысудзілі 1,5 года калоніі ва ўмовах агульнага рэжыму. Прысуд агучыў суддзя Вячаслаў Елісеенка.
У Баранавічах асудзілі 55-гадовага ветэрана вайны ў Афганістане Генадзя Борыса за абразу Лукашэнкі і сцяга. Пракурор запрасіў 3,5 гады абмежавання волі за гэтыя «злачынствы». Суд прызначыў яму 3 гады зняволення.
Следчы камітэт Беларусі паведаміў пра пачатак спецыяльнага вядзення супраць палітыка Валерыя Цапкалы. Яго абвінавацілі паводле 12 крымінальных артыкулаў, у тым ліку за атрыманне хабару, стварэнне экстрэмісцкага фармавання, заклікі да тэрарызму.
У Менскім гарадскім судзе пачаўся завочны працэс супраць Аляксандры Герасімені і Аляксандра Апейкіна, перадае БелТА. Іх вінавацяць у закліках да санкцыяў.
Святар Уладзіслаў Багамольнікаў на волі. Святара вызвалілі пад падпіску аб нявыездзе, піша «Хрысціянская візія».
Алена Аляксандрава belsat.eu
