Беларускі этна-гурт «Троіца», які быў заснаваны ў 1996 годзе, распаўся. Пра гэта паведаміў лідар калектыву Іван Кірчук.
Чарговы жыццёвы этап завяршыўся. Я прыняў рашэнне распусціць калектыў. Чакаю вас на маіх сольных выступах», – напісаў Іван Кірчук.
За 22 гады існавання гурт выпусціў сем студыйных альбомаў і атрымаў мноства ўзнагарод. Сама група з Менску, але прадстаўляла беларускі фальклор на міжнародных фестывальных пляцоўках, ад Еўропы да Чылі.
Творчы кірунак, у якім выступалі музыкі, спецыялісты называюць прагрэсіў-фолкам, гэтым тлумачыцца прымяненне разнастайных і незвычайных інструментаў.
Стваральнік і лідар «Троіцы», 64-гадовы Іван Кірчук, аб’ездзіў Беларусь у этнаграфічных экспедыцыях, падчас якіх збіраў унікальныя матэрыялы беларускай гісторыі. Ён адзін з найбуйнейшых сучасных збіральнікаў і папулярызатараў традыцыйнага фальклору. Апроч альбомаў гурта і сольных праектаў, ён рэгулярна выдае матэрыялы ўласных экспедыцый, папаўняючы веды пра беларускую культуру.
Амаль год таму ў Івана Кірчука здарыўся інфаркт, тады ў шпіталі яму зрабілі аперацыю.
Алена Рувіна belsat.eu
