Старшыня парламенцкага камітэту нацыянальнай бяспекі і абароны Лаўрынас Касчунас заявіў, што беларусы прысабечваюць гісторыю Літвы, і загадаў ім не называць сябе ліцвінамі, піша «Delfi».
Як сказаў старшыня камітэту нацыянальнай бяспекі і абароны літоўскага Сейму Лаўрынас Касчунас, прадстаўнікі беларускага дэмакратычнага руху, якія жывуць у ягонай краіне, мусяць быць занепакоеныя ўсё больш заўважнымі праявамі ліцвінства:
«Мы павінны дакладна правесці пэўныя чырвоныя лініі. Я не кажу, што гэтае ліцвінства з’яўляецца нейкай палітычнай праграмай, накіраванай супраць нас. Не. Мы чуем і прадстаўнікоў апазіцыі, якія ад яе дыстанцуюцца. Але нягледзячы на гэта, усё больш зʼяўляецца тых, хто зараз пра гэта кажа».
Дэпутат ведае пра выпадкі, калі некаторыя беларусы, атрымаўшы дазвол на пражыванне ў Літве, заяўляюць прэтэнзіі на гісторыю Вільні і Літвы.
«Калі асоба, якая прыбыла ў Літву згодна з праграмаю кваліфікаванай прафесіі, атрымаўшы магчымасць працаваць і зарабляць, працягвае адкрыта сцвярджаць у Facebook, што Літва – гэта нейкі прадукт Масковіі, не думаю, што такая асоба мае права працягваць пражыванне ў Літве», – сказаў Касчунас, спасылаючыся на нядаўнія бурныя дыскусіі адносна ўзмацнення жорсткасці абмежавальных захадаў для беларусаў.
Ён назваў нармалёвым дзяліцца гісторыяй у нейкай ступені, аднак «прысабечваць гісторыю Літвы – гэта ўжо нядобра».
«У плане самасвядомасці знаходжанне ў прасторы ВКЛ, ідэнтыфікацыя з прасторай ВКЛ сапраўды звязвае беларускае грамадства з Захадам, а не з Усходам. Але маецца пытанне межаў, як дзяліцца гэтай спадчынай», – адзначыў кіраўнік камітэту нацыянальнай бяспекі.
Дэпутат заявіў таксама, што не жадае з’яўлення ў сваёй краіне суполкі, якая «прапаведуе гэтак званую ліцвінскую ідэалогію, якая мала таго, што прысабечвае Вялікае Княства Літоўскае, але і сцвярджае, што сапраўдныя ліцвіны – гэта беларусы, а мы дзесьці на перыферыі».
Напрыканцы Лаўрынас Касчунас даў хатняе заданне беларускай дыяспары:
«Мы мусім быць гнуткімі, мы мусім зрабіць так, каб такіх праяваў не было. І даць сігнал тым жа лідарам беларускай апазіцыі – паглядзіце, каб хоць у вашай супольнасці такіх рэчаў не было. Думаць пра гэта мусім не мы. У першую чаргу пра гэта задумацца павінна беларуская грамада – гэта іхнае хатняе заданне».
Сяргей Крот belsat.eu