Пайшоў з жыцця тэатральны крытык, культурніцкі дзеяч і рэжысёр Аляксей Стрэльнікаў. Яму было 39 гадоў. Пра смерць Аляксея паведаміў кіраўнік Беларускай рады культуры Сяргей Будкін.
«Трагічная навіна. Лёшы больш няма з намі. Няшчасны выпадак здарыўся сёння. Ведаю гэтага добрага і светлага чалавека больш за 20 год, ён хросны майго сына. Разумею, якая гэта вялікая страта для яго сям’і, бацькоў, жонкі Алены і сына Льва…» – напісаў Сяргей Будкін.
Аляксей Стрэльнікаў нарадзіўся ў Новасібірску, але свядомае жыццё пражыў у Беларусі. Скончыў журфак БДУ і тэатразнаўчую аспірантуру Беларускай акадэміі мастацтваў, атрымаў ступень кандыдата мастацтвазнаўства.
Пісаў пра тэатр на шмат якіх культурніцкіх пляцоўках у Беларусі і за яе межамі, працаваў у Цэнтры беларускай драматургіі, Цэнтры візуальных мастацтваў, Цэнтры эксперыментальнай рэжысуры і «Арт Карпарэйшн».
Стрэльнікаў 7 гадоў выкладаў у Акадэміі мастацтваў, адкуль пасля пратэстаў 2020-га, у снежні таго ж года, быў звольнены за «прагул без паважных прычынаў».
Падрабязнасці смерці пакуль невядомыя.
Аляксей Стрэльнікаў быў сувядоўцам праграмы «Рэмарка» на «Белсаце». Выказваем свае спачуванні блізкім.
Алена Рувіна belsat.eu