У сераду 20 верасня ў Беларусі пачнуцца маштабныя вайсковыя вучэнні, якія працягнуцца да 26 верасня. Пра гэта ў эфіры дзяржаўнага тэлебачання заявіў намеснік дзяржаўнага сакратара Савету бяспекі Беларусі Павел Муравейка.
Да маштабных вучэнняў акрамя ўсіх відаў войскаў прыцягнуць тэрытарыяльную абарону і народнае апалчэнне. Дзе будуць праходзіць вучэнні, Павел Муравейка не ўдакладніў:
«Гаворачы пра нацыянальныя праграмы, якія штогод праводзяцца ў межах праграмаў рыхтавання Узброеных сілаў, іншых войскаў, вайсковых фармаванняў, там класічны набор захадаў падрыхтоўкі ад узводу, роты, батальёну, брыгады. Ну і звычайна завяршаецца вучэннямі ў маштабе Узброеных сілаў. У іх бяруць удзел, як правіла, усе элементы вайсковай арганізацыі дзяржавы, прыцягваецца тэрытарыяльная абарона. У апошнія вучэнні задзеяць у тым ліку народнае апалчэнне».
Таксама чыноўнік заявіў, што на супольныя вучэнні ўлады Беларусі гатовыя запрасіць і Польшчу:
«Ці можам мы правесці вучэнне з Польшчаю? Калі палякі гатовыя з намі правесці вучэнне, мы з задавальненнем выступім з такой ініцыятывай і разгледзім, якія пытанні мы можам адпрацаваць супольна».
Раней Беларусь запрашала Польшчу і Францыю назіраць за хадою вучэнняў, аднак абедзве краіны адмовіліся.
Гэта другія вайсковыя вучэнні ў Беларусі за гэты месяц. У пачатку верасня адбылося «Баявое братэрства – 2023» пад эгідай АДКБ. У арганізацыю ўваходзяць Арменія, Беларусь, Казахстан, Кыргызстан, Расея і Таджыкістан. Манеўры адбыліся на пяці палігонах у Берасцейскай, Гарадзенскай і Менскай вобласцях ды на некаторых тэрыторыях недалёка ад мяжы з Польшчай і Літвою. Таксама чакалася, што гэтаю восенню Расея і Беларусь могуць правесці вучэнні серыі «Захад», аднак у выніку расейскае Міністэрства абароны адмовілася ад іх. Раней брытанская выведка паведамляла, што вучэнні былі адмененыя праз праблемы, з якімі Расея сутыкнулася ва Украіне.
Алена Рувіна belsat.eu
