Дэпутаты Еўрапарламенту лічаць, што ЕЗ павінен павялічыць вайсковую, палітычную і гуманітарную дапамогу Украіне. Таксама ЕЗ павінен умацаваць сваю абарону. Такія тэзісы знайшлі сваё адлюстраванне ў штогадовым дакладзе аб агульнай вонкавай палітыцы і палітыцы бяспекі Еўразвязу.
Дэпутаты Еўрапарламенту прынялі штогадовы даклад аб агульнай вонкавай палітыцы і палітыцы бяспекі ЕЗ. Дакумент падтрымалі 407 дэпутатаў, 142 устрымаліся і 92 выступілі супраць.
У дакладзе гаворыцца, што аўтакратыі ва ўсім свеце пільна сочаць за рэакцыяй ЕЗ на агрэсіўную вайну Расеі супраць Украіны і гэта будзе моцна ўплываць на іх паводзіны на міжнароднай арэне. Менавіта таму, на думку еўрапаламентарыяў, Еўразвяз павінен зрабіць працэс прыняцця рашэнняў больш гнуткім і эфектыўным.
Акрамя гэтага дэпутаты заклікалі канцлера Нямеччыны Оляфа Шольца без затрымак паставіць ва Украіну баявыя танкі «Leopard 2», паколькі Украіна мае патрэбу ў ваеннай дапамозе і цяжкім узбраенні для перамогі ў вайне.
Алена Аляксандрава belsat.eu