Працаўнікі прадпрыемства «Полацк-Шкловалакно» могуць атрымліваць заробкі не грашыма, а «ў натуральнай форме» – прадукцыяй. Палажэнне наконт такой аплаты іхнае працы набыла моц з 1 жніўня.
Як піша завадская газета «Працоўная змена», працаўнікам прадпрыемства «Полацк-Шкловалакно», каб атрымаць заробак «у натуральнай форме», неабходна падаць пісьмовую заяву ў адміністрацыю. Прычым сума тавараў не можа перавышаць 200 рублёў за месяц.
На прадпрыемстве ўзнавілі таксама сістэму разлікаў за абеды ў сталоўцы за кошт будучых заробкаў.
Навуковы кіраўнік Офісу простых рашэнняў і вынікаў (Украіна) Яраслаў Раманчук лічыць, што ў лукашэнкаўскай таталітарнай дзяржаве пытанне пра законнасць выплаты заробкаў бартарам – рытарычнае.
«Калі працаўнікі не маюць голасу, калі іх не бароняць прафсаюзы і правы – тады кіраўнікі робяць, што захочуць. Паколькі ніякіх пазоваў у суд ніхто не падаваў, то пытанне пра законнасць – рытарычнае. Усё залежыць ад таго, як да гэтага паставіцца раённае начальства ці нейкія кантралёры», – кажа Яраслаў Раманчук.
З ягоных словаў, калі працаўнікі таго ці іншага прадпрыемства проста сядзяць і чакаюць манны нябеснай, то чакаць давядзецца яшчэ вельмі доўга.
«Але гэта, безумоўна, сведчыць пра вельмі дрэнны стан рэчаў на тым або іншым прадпрыемстве», – падкрэслівае эканаміст.
Выплата заробкаў «у натуральнай форме», кажа Раманчук, – «гэта з галечы, неэфектыўнага кіравання і адсутнасці абаротнага капіталу».
Яшчэ – з прычыны форс-мажорных акалічнасцяў, у якія трапілі многія беларускія прадпрыемствы ў сувязі з увядзеннем санкцыяў ЕЗ супраць лукашэнкаўскага рэжыму як суагрэсара ў вайне супраць Украіны.
«І менавіта гэта магло стаць прычынай таго, што прадпрыемствы не могуць сёння ні прадаць прадукцыі, ні паспяхова канкураваць», – кажа эксперт.
Яраслаў Раманчук канстатуе, што пакуль факты выплаты заробкаў бартарам не вельмі распаўсюджаныя ў Беларусі, але прагназуе, што яны будуць пашырацца, калі «беларуская эканоміка нічога не будзе рабіць і будзе заставацца ў пракруставым ложы дзяржплану».