Адбыўся чарговы абмен палоннымі паміж Расеяй і Украінай у фармаце 20 на 20 чалавек. У ліку палонных, якія вярнуліся ва Украіну, – 14 вайскоўцаў ЗСУ, чацвёра байцоў тэрабароны, адзін нацгвардзеец і вайсковец вайскова-марскіх сілаў. Пра гэта паведаміў кіраўнік Офісу прэзідэнта Украіны Андрэй Ермак.
Сярод украінцаў, якія вярнуліся з палону, ёсць людзі, якіх расейцы ўтрымлівалі ў Аленаўцы, на часова акупаваных тэрыторыях Запарожскай і Херсонскай вобласцяў.
«Хлопцы праходзяць медычны агляд, усе шчаслівыя быць на роднай зямлі. Іх вельмі чакалі ўдома. Часта гэта жонкі і бацькі, а шмат каго чакаюць дзеці», – дадаў Андрэй Ермак.
Дзе менавіта абмяняліся палоннымі, не паведамляюць. Вядома, што раней некалькі абменаў палоннымі паміж Расеяй і Украінаю праводзілі на беларуска-ўкраінскай мяжы.
Папярэдні абмен палоннымі паміж Украінай і Расеяй адбыўся 11 кастрычніка. Тады ва Украіну вярнуліся 32 абаронцы, а таксама цела загінулага ізраільцяніна Дзмітрыя Фіялкі. Сярод вызваленых – афіцэры, сяржанты і салдаты ЗСУ. Усе яны былі ў месцах, дзе трывалі актыўныя баявыя дзеянні. Шмат каго з іх лічылі зніклымі без вестак.
Загінулы ізраільцянін Дзмітрый Фіялка апошнія два гады жыў ва Украіне, працаваў дзіцячым трэнерам па футболе ў клубе львоўскага «Дынама». На фронт ён пайшоў добраахвотнікам.
Алена Рувіна belsat.eu