Улады Малдовы дэпартавалі з краіны кіраўніка расейскага інфармацыйнага агенцтва «Sputnik Молдова» Віталя Дзянісава. Яго прызналі асобай, якая прадстаўляе пагрозу нацыянальнай бяспецы Рэспублікі Малдова. Пра гэта паведамляе «РИА Новости».
Віталь Дзянісаў расказаў, што раніцай 13 верасня ў кватэру, дзе ён пражываў у Кішынэве, прыйшлі супрацоўнікі міграцыйнай службы Малдовы. Яго завезлі ў аэрапорт і выдалі пастанову пра дэпартацыю і забарону ўезду ў Малдову на працягу 10 гадоў. Першым жа рэйсам яго адправяць у Маскву.
Паводле кіраўніка «Sputnik Молдова», яго палічылі пагрозаю нацыянальнай бяспецы краіны.
Усе рэсурсы «Sputnik Молдова» былі заблакаваныя ў гэтай краіне неўзабаве пасля пачатку поўнамаштабнай вайны Расеі супраць Украіны. Блакаванне патлумачылі рызыкай распаўсюджвання «дэзынфармацыі, якая закранае нацыянальную бяспеку».
Нагадаем: у ліпені і жніўні 2023 года Малдова выслала 45 расейскіх дыпламатаў і супрацоўнікаў пасольства праз асцярогі наконт спробаў Масквы «дэстабілізаваць» сітуацыю ў краіне. Перад гэтым выйшла расследаванне, у якім гаварылася, што на даху расейскага пасольства ў Кішынэве размешчаны антэны, якія дазваляюць праслухоўваць тэлефонныя перамовы.
Алена Рувіна belsat.eu