Вясна пакрысе набірае моцы, а з ёю і ўсе раслінкі брыняюць сакавітасцю і вітамінамі. Гэта значыць, надышоў час для вясновых страваў, што менавіта цяпер будуць самыя карысныя і смачныя. І куды ж тут без супчыкаў? Дзелімся з вамі некаторымі рэцэптамі самых лёгкіх і смачных з іх.
Суп са шчаўя
Нам спатрэбіцца:
- Мясны булён (можна і без яго, калі вы не ясце мяса) – 2 літры
- Пучок шчаўя
- Бульба – 3-4 штукі
- Курыныя яйкі – 2-3 штукі
- Соль, перац, зеляніна – на смак
- Смятана
Адварваем кавалак мяса з перцам і соллю, пасля дастаём яго з булёну. Пры жаданні мяса можна дадаць у гатовы суп. Дробна наразаем шчаўе, бульбу і дадаём у булён. Як толькі бульба зварыцца (а гэта хвілінаў 5), выключыце рондаль і дайце страве настаяцца. Курыныя яйкі трэба зварыць і імі ўпрыгожыць суп. Дадаць зеляніну са смятанай.
Халодны суп з рабарбару
Нам спатрэбіцца:
- Рыба – о,5 кілаграма
- Вада – 1,5 літра
- Рабарбар – 300 грамаў
- Яйкі курыныя – 2 штукі
- Агурок – 1 штука
- Соль, цукар на смак
Хвосцікі рабарбару парэзаць дробнай саломкай, заліць вадой, праварыць 3-4 хвіліны, зняць з агню і даць настаяцца 2 гадзіны. Бульбу, рыбу і яйкі зварыць асобна і нарэзаць на кавалкі. Нарэзаць агурок. Падаваць на талерцы, заліўшы гэтую нарэзку халодным адварам з рабарбару. Можна са смятанаю.
Крапіўнік
Нам спатрэбіцца:
- Бульба – 2 штукі
- Смятана – 2 лыжкі
- Цыбуля – 1 штука
- Морква – 1 штука
- Алей
- Крапіва – 1 пучок
- Зеляніна – на смак
- Цытрынавы сок – 1 лыжка
- Соль, перац – на смак
- Вада – 1,5 літра
Адварыць бульбу, расцерці са смятанай і вярнуць у той жа рондаль. Нарэзаць цыбулю, натаркаваць моркву і падсмажыць на алеі 4-5 хвілінаў. Дадаць у рондаль. Вымыць, нарэзаць крапіву і зеляніну і таксама дадаць да супу. Заліць сок цытрыны, пасаліць і паперчыць. Праз 2 хвіліны гатовы суп можна разліваць у талеркі.
Крэм-суп з радыскі
Нам спатрэбіцца:
- Радыска – 2 пучкі
- Бульба – 4 штукі
- Масла – 20 грамаў
- Свежая зялёная цыбуля
- Морква – 1 штука
- Кроп і спецыі – на смак
Бульбу адварыць, дадаць таркаваную падсмажаную моркву, нарэзаную радыску, масла, соль, спецыі. Варыць яшчэ хвілінаў 10. Дадаць кроп і цыбулю і змалоць суп у блэндары.
Суп-парэй
Нам спатрэбіцца:
- Малады парэй – 2 пучкі
- Зеляніна – на смак
- Бульба – 2-3 штукі
- Булён з гародніны ці мясны – 1,5 літра
- Цыбуля – 1 штука
- Соль, перац, мускатны гарэх – на смак
- Алей
- Ёгурт – 2 лыжкі
Зварыць булён, дадаць да яго парэзаную бульбу. Пакуль тая варыцца, падсмажыць цыбулю і дадаць у рондаль. Варыць яшчэ хвіліны 4. Дадаць парэзаны парэй, зеляніну, спецыі і ёгурт. Даць супу настаяцца хвілінаў 20 – і можна разліваць у талеркі.
Вяршковы суп-пюрэ з кальрабі
Нам спатрэбіцца:
- Кальрабі – 2 штукі
- Цыбуля – 1 штука
- Алей
- Масла – 10 грамаў
- Мясны булён – 1,3 літра
- Вяршкі (20-30 %) – 0,1 літра
- Соль – на смак
- Сухарыкі
Пачысціць і нарэзаць кубікамі кальрабі. Разагрэць рондаль, дадаць алей і цыбулю. Пасмажыць некалькі хвілінаў і дадаць кальрабі ды масла. Тушыць некалькі хвілінаў, заліць усё булёнам і варыць да мяккасці. Змалоць у блэндары і прапусціць праз сіта. Дадаць у суп вяршкі і варыць яшчэ 1-2 хвіліны. Разліты ў талеркі суп пасыпаць сухарыкамі.
Пра супы і іх карысць спрэчкі вядуцца шмат гадоў. Спачатку медыкі распавядалі пра важнасць штодзённага ўжывання вадкай стравы, пазней – наадварот, казалі, што суп – гэта пустая ежа беднякоў. У любым разе, горш ад такой стравы не будзе, а калі яе згатаваць з розумам, то і рэцэптары атрымаюць адное толькі задавальненне. А добры настрой – адная з галоўных умоваў псіхічнага здароўя. Таму смачна есці!
Марыя Голдстэйн belsat.eu
