Рэдактар аршанскага сайта orsha.eu Ігар Казмярчак аб’яўлены ў міждзяржаўны вышук на тэрыторыі СНД, паведамляюць праваабаронцы. Летась у лістападзе журналіст зʼехаў з Беларусі.
Сёлета ў траўні Ігара Казмерчака аб’яўлялі ў вышук у Беларусі, яго фота зʼявілася на дошцы «Іх шукае міліцыя» ў Воршы. Пра гэта паведамляў сам Казмярчак у Facebook.
У абʼяве сказана, што Казмярчак схаваўся ад следства і зʼяўляецца абвінавачаным у крымінальным артыкуле аб абразе прэзідэнта, крымінальную справу супраць яго распачалі ў красавіку 2022 года. Што канкрэтна расцанілі як абразу, не паведамляецца. Паводле Казмерчака, справу завялі 1 красавіка.
Ігар Казмярчак вядомы не толькі як журналіст і рэдактар сайту, але і як грамадскі і палітычны актывіст, праваабаронца, краязнаўца і прадпрымальнік. У лістападзе мінулага года сайт orsha.eu заблакавалі на тэрыторыі Беларусі па рашэнні пракуратуры. Летам 2021 года Казмерчака затрымлівалі па падазрэнні ў апаганенні збудаванняў і пашкоджанні маёмасці (артыкул 341 КК), але пазней справу закрылі.
«Мы стварылі сістэму агентуры ў горадзе». Паразмаўлялі з рэдактарам Orsha.eu Ігарам Казмерчаком
Алена Рувіна belsat.eu
