Генеральны сакратар NATO Енс Стольтэнбэрг падчас саміту арганізацыі ў Вільні на брыфінгу 11 ліпеня адказаў на пытанні карэспандэнтаў «Белсату» пра Беларусь.
У прыватнасці, на пытанне Сяргея Пелясы ён заявіў, што ў Беларусі няма наймітаў ПВК Вагнэра.
«Мы пакуль не бачым ніякіх рухаў «Вагнэра» ў бок Беларусі, але мы ўважліва сочым за тым, што адбываецца. Гэта важна для Літвы і яе суседзяў», – заявіў генеральны сакратар, адзначыўшы, што NATO змагаецца з любой патэнцыйнай пагрозай.
Адказаў Стольтэнбэрг і на пытанне Аляксандра Папко адносна размяшчэння ў Беларусі ядравай зброі і магчымага тэракту на Запарожскай АЭС. Паводле яго, ядравай зброі ў Беларусі таксама няма.
«Расея павінна ведаць, што ядравую вайну немагчыма выйграць, і яе ніколі нельга пачынаць. Саюзнікі ў NATO ўважліва сочаць, што Расея робіць. Мы асуджаем абвесткі, што Расея размесціць тактычную ядравую зброю ў Беларусі. Мы ўважліва маніторым сітуацыю, але пакуль не бачым ніякіх зменаў, якія патрабуюць зменаў з нашага боку», – сказаў Стольтэнбэрг.
Паводле яго, Расея таксама павінна вывесці свае войскі з Запарожскай АЭС, бо іх паводзіны ствараюць небяспеку для найбуйнейшай атамнай станцыі ў Еўропе.
Якуб Хруст belsat.eu