Працу выбітнага беларускага лінгвіста Змітра Саўкі «Фанетычна-графічная адаптацыя запазычанняў у беларускай мове» адзначылі спецыяльнай узнагародай «In memoria». Аўтар даследавання памёр у 2016 годзе.
У Польшчы ўзнагародзілі пераможцаў трэцяга конкурсу на найлепшую навуковую манаграфію па беларускай і ўкраінскай культуры імя Мялеція Сматрыцкага пад патранатам свайго рэктара Варшаўскага ўніверсітэту.
Манаграфія Змітра Саўкі «Фанетычна-графічная адаптацыя запазычанняў у беларускай мове», выдадзеная кафедраю беларусістыкі Варшаўскага ўніверсітэту, атрымала ад журы спецыяльны прыз «In memoria». Кніга ўваходзіць у групу даследаванняў, звязаных з адною з найважнейшых праблемаў сучаснай беларускай мовы – кадыфікацыяй мовы.
Журы конкурсу высока ацаніла шматгадовую працу Змітра Саўкі для развіцця беларускай мовы.
Зміцер Саўка (1965–2016), беларускі лінгвіст, выкладчык, аўтар праграмы «Моўнік» на тэлеканале «Белсат». Адзін з распрацоўнікаў сучаснай кадыфікацыі тарашкевіцы («Беларускі класічны правапіс», Менск, 2005). Аўтар шматлікіх мовазнаўчых публікацыяў, у тым ліку грунтоўных даследаванняў новай рэдакцыі Правілаў беларускага правапісу і пунктуацыі.
Зміцер Саўка быў стыль-рэдактарам тэлеканалу «Белсат» (2007–2016), аўтар шматфункцыйнага онлайнавага сэрвісу «Добрапіс», што дапамагае пазбавіцца памылак у беларускім тэксце, напісаным афіцыйным і класічным правапісамі.
Глеб Нержын belsat.eu