Журы літаратурнай прэміі Ежы Гедройця вызначыла шасцярых намінантаў на ўзнагароду, якія ўвайшлі ў кароткі спіс. Пералік прозвішчаў з’явіўся на старонцы прэміі ў «Фэйсбуку».
«Прэмія Ежы Гедройця хуткаю хадою набліжаецца да фіналу! Журы правяло фундаментальную працу, каб абраць з пятнаццаці моцных намінантаў шасцярых, якія ўвайшлі ў кароткі спіс», – гаворыцца ў паведамленні ў «Фэйсбуку».
У шорт-ліст ХІІ сезону літаратурнай прэміі ўвайшлі:
- Алег Дашкевіч з кнігай «З вышыні птушынага палёту» (Менск: Р. Цымбераў, 2022)
- Сяргей Лескець з кнігай «Шэпт» (Менск: выдавецкая ініцыятыва «Вільма» супольна з Р. Цымбераў, 2022)
- Ганна Кандрацюк з кнігай «У прысценку старога лесу. Гісторыі людзей з Белавежскай пушчы» (Праграмная рада тыднёвіка «Ніва», 2022)
- Сцяпан Стурэйка з кнігай «Пасажыры карабля Тэсэя» (Менск: Янушкевіч, 2022)
- Іна Снарская з кнігай «Зачараваны скарб» (Менск: Р. Цымбераў, 2022)
- Макс Шчур з кнігай «Там, дзе нас няма» (Логвінаў, 2022)
Літаратурная прэмія імя Ежы Гедройця была заснаваная 28 снежня 2011 года. Яна прысуджаецца за найлепшую кнігу прозы, якая выдадзена ў папяровым або электронным варыянтах у папярэднім годзе адносна часу прысуджэння прэміі ў жанрах «мастацкая проза» і «эсэістыка». Прэмія была названа ў гонар ураджэнца Менску, польскага публіцыста і палітыка Ежы Гедройця.
Марыя Міхалевіч belsat.eu
