Надвор’е ў Беларусі рэзка сапсавалася: яшчэ на мінулым тыдні было за +20 і сонечна, цяпер жа – ад +3 да +12, моцны вецер, дажджы, град і нават снег.
На 8 кастрычніка ў Беларусі абвяшчалі аранжавы ўзровень небяспекі, штармавое папярэджанне. Вецер валіў дрэвы і аўтобусныя прыпынкі, паведамлялі карыстальнікі з Менску, Горадні, Лагойску і іншых гарадоў.
Статыстыку пашкоджанняў за 8 кастрычніка яшчэ не прыводзяць, але днём раней вецер паваліў 240 дрэваў, пад паваленымі дрэвамі аказалася 32 машыны. У Горацкім раёне Магілёўскай вобласці пашкодзіла дахі аднаго жылога і чатырох сельскагаспадарчых будынкаў.
У панядзелак, 9 кастрычніка, наўрад ці будзе лепей: ратавальнікі папярэджваюць пра вецер парывамі да 15-20 м/с (ноччу – па ўсёй тэрыторыі Беларусі, днём – пераважна на ўсходзе), метэаролагі абяцаюць амаль такое ж надвор’е, як 8 кастрычніка, ноччу – месцамі замаразкі.
Паводле папярэдніх прагнозаў, у аўторак, 10 кастрычніка, вецер крыху сціхне, але затым зноў стане моцным – кепскае надвор’е захаваецца да канца тыдня.
Верасень быў самым цёплым у Беларусі за апошнія 78 гадоў. А ў кастрычніку ўжо ўключаць ацяпленне ў дамах. Аб пачатку ацяпляльнага сезону (пакуль – у сацыяльнай інфраструктуры кшталту школаў і лякарняў) паведамілі ўжо ў Віцебскай, Гомельскай і Менскай вобласцях.
Алесь Наваборскі belsat.eu
