У Менгарвыканкаме абмеркавалі пашырэнне гарадской сеткі камераў відэаназірання. Чыноўнікі і міліцыянты плануюць павялічыць іхную колькасць мінімум утрая, паведамляе Telegram-канал «Милиция Минска».
У сустрэчы ўзялі ўдзел старшыня Менгарвыканкаму Уладзімір Кухараў, кіраўнік менскага ГУУС Міхаіл Грыб і «іншыя зацікаўленыя» асобы.
Яны абмяркоўвалі выкананне планаў, пра якія казалі на мінулай нарадзе, прысвечанай гарадской сістэме відэаназірання, што адбылася ў сёлетнім красавіку.
«Прадстаўнікі арганізацыяў паведамілі аб праблемах, з якімі сутыкнуліся пры рэалізацыі плана, пасля чаго разам былі вызначаныя шляхі развязання», – гаворыцца ў допісе Telegram-канал «Милиция Минска».
Што гэта за праблемы, не ўдакладняецца.
Найперш цяперашнія ўлады рыхтуюцца да таго, каб абсталяваць відэакамерамі ўсе ўчасткі для галасавання выбарчай кампаніі ў наступным годзе, што «дапаможа забяспечыць ейную празрыстасць і бяспеку грамадзянаў».
А пасля плануюць мінімум утрая павялічыць колькасць камераў, улучаных у Рэспубліканскую сістэму відэаманіторынгу. Як хутка гэта здарыцца, пакуль не вядома.
Сістэма відэаманіторынгу, што выкарыстоўваецца ў Беларусі, называецца «Kipod», яе распрацавала кампанія «Synesis». З ейнай дапамогаю ідэнтыфікуюць удзельнікаў пратэсных акцыяў.
Сяргей Крот belsat.eu
