Абраная прэзідэнтка Беларусі Святлана Ціханоўская 8 студзеня пачала візіт у Варшаву. Ранкам яна ўганаравала дырэктара і намесніка дырэктара «Белсату» «Знакам Гонару» дэмакратычных сілаў.
Узнагароды ад Святланы Ціханоўскай атрымалі дырэктар «Белсату» Агнешка Рамашэўская-Гузы і намеснік дырэктара Аляксей Дзікавіцкі.
«Гэта знак гонару дэмакратычных сілаў Беларусі за супрацу з намі, за тое, што вы з намі ўсе гэтыя гады. І далей я спадзяюся, што ўсё будзе добра з каналам “Белсат”, будзеце развівацца, бо вы граеце такую вялікую ролю для Беларусі», – сказала Ціханоўская.
Кіраўнікі «Белсату» размаўлялі з Ціханоўскай пра сітуацыю ў Польскай грамадскай тэлевізіі ў ключы пераменаў, што цяпер адбываюцца, і сітуацыі на «Белсаце» ў сувязі з гэтым. Ціханоўская адзначыла значэнне «Белсату» для Беларусі і дэмакратычных сілаў, таму абяцала зрабіць усё магчымае, каб падтрымаць канал.
Ціханоўская і прадстаўнікі Аб’яднанага пераходнага кабінету 8–10 студзеня плануюць сустрэчы і перамовы з прэзідэнтам Польшчы, са спікерамі Сейму і Сенату Польшчы, міністрам замежных справаў, міністаркай адукацыі і міністрам еўрапейскіх справаў. На сустрэчах абяцалі абмеркаваць пытанні легалізацыі беларусаў у Польшчы і ўмацаванне беларуска-польскай супрацы падчас старшынства Польшчы ў Радзе Еўразвязу.
8 студзеня Ціханоўская і прадстаўнікі Кабінету адкажуць на пытанні беларусаў у 60-хвілінным онлайн-стрыме. Трансляцыя тут, пачатак а 19:00 паводле беларускага часу.
9 студзеня Святлана Ціханоўская разам з прэзідэнтам Анджэем Дудам правядзе прыём для беларускай супольнасці ў Польшчы з нагоды святаў, што ўжо зрабілася традыцыяй.
Алесь Наваборскі belsat.eu
