У ноч з 5 на 6 лістапада расейскія войскі атакавалі Украіну 22 ударнымі дронамі і чатырма ракетамі рознага тыпу, украінскія абаронцы знішчылі 15 беспілотнікаў і адну ракету Х-59. Пра гэта паведамілі Паветраныя сілы ЗСУ.
Было выпушчана па адной кіраванай авіяракеце Х-31 і Х-59 з паветранай прасторы акупаванай часткі Херсоншчыны, а таксама былі выпушчаныя супрацькарабельная ракета П-800 «Онікс» і балістычная ракета «Іскандэр-М» з тэрыторыі акупаванага Крыму. Апроч таго, з Крыму былі запушчаныя 22 ударныя БПЛА «Shahed-136/131».
Украінскія сілы, як заяўляецца, знішчылі 15 беспілотнікаў і ракету Х-59.
Сілы абароны поўдня Украіны паведамілі, што дзве ракеты трапілі ў цэнтр Адэсы і ў закансерваваны прамысловы будынак. Выбухная хваля знявечыла некалькі шматпавярховых жылых дамоў, у тым ліку музей у гістарычнай частцы гораду, аднесены да спадчыны ЮНЭСКО. Як заявіў мэр Адэсы Генадзій Труханаў, «трохі туды, трохі сюды і маглі б мы пазбавіцца многіх нашых узораў, экспанатаў, вельмі вядомых на ўвесь свет».
Дроны ж атакавалі прыпартовую інфраструктуру Адэсы. Былі пашкоджаныя складскія памяшканні, разгрузная спецтэхніка, аўтамабілі са збожжам.
Таксама ракета Х-31 трапіла ў Херсон, дзе пашкодзіла пяціпавярховы дом.
У выніку начнога ўдару па Адэсе раненні атрымалі 8 мясцовых жыхароў, паведаміў кіраўнік Адэскай абласной вайсковай адміністрацыі Алег Кіпэр. Пяцёра параненых шпіталізаваныя.
Уначы 23 ліпеня падчас расейскага абстрэлу Адэсы ракета трапіла ў Спаса-Праабражэнскі кафедральны сабор Украінскай праваслаўнай царквы. У выніку былі часткова разбураныя будынак сабору, перакрыцце трох ніжніх паверхаў, а таксама значна пашкоджанае ўнутранае аздабленне і абразы. Таксама цалкам знішчаныя службовыя памяшканні ніжняй часткі сабору.
Якуб Хруст belsat.eu