Віцэ-прэм’ер Беларусі Пятро Пархомчык распавёў у эфіры тэлеканалу ОНТ, што з верасня аўтамабільны завод «БелДжы» пачынае працаваць на поўную магутнасць.
«Думаю, што ўсе спажыўцы, якія захочуць набыць легкавы аўтамабіль маркі «БелДжы», будуць задаволеныя. Плануем за астатнія месяцы вырабіць каля 12 тысяч аўтамабіляў. У прынцыпе, у грашовым выражэнні мы выйдзем на той жа аб’ём, які зрабілі летась. Калектыў працуе, своечасова атрымлівае заробак. Ну і асноўныя пытанні, я лічу, вырашаныя», – заявіў Пархомчык.
У пачатку жніўня паведамлялася, што завод не зможа выканаць вытворчых планаў і паўтарыць леташняга ўзроўню выпуску ў выніку праблемаў з пастаўкамі, звязанымі з санкцыямі, а ўжо ў канцы жніўня Пархомчык паведаміў, што заводу ўдалося развязаць амаль усе пытанні з кітайскімі партнёрамі.
«БелДжы» – беларуска-кітайскае супольнае прадпрыемства для зборкі кітайскіх легкавых аўтамабіляў маркі «Geely». Першапачаткова аўтамабілі планавалі збольшага прадаваць у Расеі.
Алена Рувіна belsat.eu
