Цяпер часопіс «Наша гісторыя» будзе выходзіць на электроннай платформе.
«Пасля перапынку мы аднаўляем выхад выдання, які ў пачатку гэтага года спынілі абставіны.
Выдаваць папяровае выданне ў Беларусі пакуль немагчыма, а за мяжою не акупілася б, таму часопіс будзе выходзіць на электроннай платформе», – адзначаецца ў заяве рэдакцыі.
Рэдакцыя заклікае аўтараў дасылаць артыкулы на электронны адрас historyja2018@gmail.com у № 41 адноўленага часопісу. Артыкулы прымаюцца як прафесійных гісторыкаў, журналістаў, літаратараў, так і простых людзей. Па жаданню аўтары могуць захоўваць ананімнасць, часопіс гатовы публікаваць артыкулы і пад псеўданімамі, і без подпісаў.
Рэдакцыя «Нашай гісторыі» нагадвае, што 40 выпускаў часопісу ў Беларусі разышліся агульным накладам больш за 200 тысяч асобнікаў.
«Мы прагнем, каб адноўленае выданне было такое ж запатрабаванае і паслужыла нашаму слаўнаму і гераічнаму народу», – адзначаецца ў заяве.
Глеб Нержын belsat.eu