У судзе Першамайскага раёну Менску другі дзень запар праходзіць судовае паседжанне над палітзняволенымі лідарамі Аб’яднанай грамадзянскай партыі Аксанай Аляксеевай, Мікалаем Казловым і Антанінай Кавалёвай. Сёння, 2 кастрычніка, пракурор запрасіў тэрміны для зняволеных.
Пракурор запытаў для лідара АГП Мікалая Казлова 2,5 года пазбаўлення волі ў калоніі. Для Аксаны Аляксеевай абвінаваўца запытаў 1,5 года пазбаўлення волі, а для Антаніны Кавалёвай – год зняволення, паведамілі на старонцы АГП у Facebook. Ім усім інкрымінуюць арт. 342 КК РБ («Арганізацыя і рыхтаванне дзеянняў, якія груба парушаюць грамадскі парадак, або ўдзел у іх»).
Прысуд агучаць заўтра, 3 лістапада, а 10:50. Справу разглядае суддзя Анастасія Кулік.
На судзе Мікалай Казлоў адзначыў, што не разумее, у чым яго абвінавачваюць, бо гэта сумесь «дзіўнай логікі і нястрымнай фантазіі». На пытанне суда, ці прызнае сваю віну, ён адказаў: «Я прызнаю сябе больш пацярпелым, чым вінаватым». Кавалёва прызнала сваю віну часткова, Аляксеева – цалкам. Таксама Казлоў настойваў на тым, што на марш ён прыйшоў як грамадзянін Беларусі, а не палітык. Таксама Мікалай звярнуў увагу, што рух транспарту быў спынены ўладамі да таго, як пратэстоўцы пачалі выходзіць на праезную частку.
«Галоўнае хараство 2020 года было якраз у тым, што гэта была мірная акцыя, то як адзін да аднаго ставіліся, для мяне гэта было адкрыццё, прыемнае здзіўленне», – сказаў Казлоў на судзе.
Раніцай 27 ліпеня сілавікі прыйшлі да шэрагу чальцоў Аб’яднанай грамадзянскай партыі, тады і затрымалі Аксану Аляксееву, Мікалая Казлова і Антаніну Кавалёву. Пазней стала вядома, што Казлова пасля затрымання збівалі на Акрэсціна і на «Валадарку» яго прывезлі з «сінімі нагамі». Таксама ад яго амаль не даходзяць лісты.
У пачатку гэтага года Казлоў адбыў тры месяцы арышту паводле ч. 1 арт. 407 КК РБ за «Раскрыццё звестак у крымінальнай справе» супраць Каардынацыйнай рады (праваабаронцы прызналі яго палітвязнем), выйшаў на волю 26 сакавіка. Тады да яго не было прэтэнзіяў за «дзеянні, якія груба парушаюць парадак». Па вызваленні ён застаўся ў Беларусі.
Алена Рувіна belsat.eu
