30 верасня беларуска Лілія Яноўская паднялася на вяршыню гары Дгаўлягіры і разгарнула там бела-чырвона-белы сцяг.
63-гадовая беларуская альпіністка сталася найстарэйшаю жанчынаю, якая ўзнялася на гэтую гару.
«Цяжка паверыць, што мы ўзняліся на гэтую дзівосную гару ўсяго дзень таму. Дгаўлягіры – сёмая паводле вышыні гара ў свеце, яе вышыня складае 8167 метраў. Гэта была адна з маіх найлепшых высакагорных экспедыцыяў дагэтуль – усё склалася добра: надвор’е, акліматызацыя, стратэгія і, вядома, цудоўная каманда шэрпаў», – напісала Лілія Яноўская ў сваім акаўнце ў Facebook.
Дгаўлягіры – шматвяршыневы горны масіў у Гімалаях, месціцца на тэрыторыі Непалу. Усяго ў гэты масіў уваходзяць 11 вяршыняў, галоўная з якіх (Дгаўлягіры) перавышае 8 кіламетраў, астатнія дзесяць перавышаюць 7 кіламетраў.
Лілія Яноўская паходзіць з Менску, але яшчэ ў канцы 1990-х пераехала жыць у Канаду. 14 траўня 2022 года яна ўзняла беларускі нацыянальны сцяг над самай высокай вяршыняй свету – Эвэрэстам.
22 ліпеня 2022 года Лілія таксама паднялася на гару K2 у Пакістане – адну з самых небяспечных гораў свету з вышынёй піку 8610 метраў над узроўнем мора і адноснай вышынёй 4020 метраў.
Раман Шавель belsat.eu