24 кастрычніка ў Менску мае прайсці Ганарлівы жаночы марш прафесіяў. Акцыя мае распачацца ў скверы Сімона Балівара а 14-ай і завершыцца а 16-ай гадзіне.
Чытачы belsat.eu паведамляюць пра аўтазакі і міліцэйскія бусы каля скверу Сымона Балівара ў Менску, дзе сёння плануецца жаночая акцыя.
18:20. Паводле БАЖ, у Менску затрымалі здымачную групу тэлеканала Sky News: грамадзянку Вялікай Брытаніі Даяну Магнэй, а таксама беларускіх калегаў Анастасію Лявонаву і Вадзіма Нячаева. Грамадзянка Вялікай Брытаніі мае акрэдытацыю МЗС. Журналістаў затрымалі на вуліцы Якуба Коласа, цяпер яны знаходзяцца ў Савецкім РУУС.
17:30. На плошчу Незалежнасці выйшлі людзі з камуністычнай сімволікай. Іх не больш як два дзясяткі.
17:00. У спісах «Вясны» сёння 10 затрыманых удзельніц Жаночага маршу. Тэлеграм-чат «Списки Задержанных (Жодино+Окрестина+Барановичи)» піша пра 14 затрыманых.
16:40. Распачаўся жаночы «дэмарш» — удзельніцы не збіраюцца ў адну калону, як падчас маршу, а ходзяць невялікімі групамі. Па праспекце ездзяць сілавікі і два аўтазакі.
16:00. Акцыя завершылася. Жанчыны плануюць працягнуць далей гуляць па праспекту Незалежнасці.
15:40. На акцыі зноўку працуюць журналісты дзяржаўнага тэлебачання.
15:30. Не даходзячы да метро Акадэмія навук калона развярнулася і жанчыны пайшлі ў адваротным кірунку.
15:20. Акцыю суправаджаюць міліцэйскія мікрааўтобусы.
15:00. Калона ідзе па праспекту Незалежнасці ў бок Акадэміі Навук.
14:50. Удзельніцы жаночага маршу скандуюць «Забастоўка!»
14:40. Жаночы марш рушыў да пл. Перамогі.
У першыя хвіліны пасля пачатку акцыі зʼявіліся паведамленні пра затрыманні першых удзельніц маршу.
- Жаночыя маршы ў Беларусі праходзяць штосуботу з канца жніўня. Праз ціск сілавікоў і затрыманні ўдзельніц акцыі мянялі фармат і праходзілі ў выглядзе прагулак жанчын з кветкамі ў цэнтры Менску. Удзельніцы акцыяў выступаюць супраць міліцэйскага бязмежжа і заклікаюць да адстаўкі Аляксандра Лукашэнкі.
АА belsat.eu
