Саліст гурта «Океан Ельзи» спявак Святаслаў Вакарчук распавёў пра свае палітычныя амбіцыі і паабяцаў прывесці ва ўкраінскую палітыку новыя асобы.
Пра гэта ён заявіў 22 студзеня ў час мерапрыемства «Рэальныя змены ў Украіне – залог паспяховай будучыні», паведамляе «Украінская праўда».
«Я ў справе і вы даведаецеся больш у бліжэйшы час. Я хацеў бы прывесці ва ўкраінскую палітыку як мага больш новых асобаў. Улада як такая мяне не цікавіць», – адзначыў Вакарчук у адказ на пытанне, ці будзе балатавацца на выбарах прэзідэнта Украіны ў 2019 годзе.
«Тое, што кіруе мной у палітыцы, – гэта расчараванне ў сувязі з цяперашнім станам украінскай палітыкі. Глядзець на ўсе гэтыя асобы на білбордах вакол Кіева невыносна», – растлумачыў Вакарчук.
Паводле музыкі, Украіне патрэбныя новыя палітычныя лідэры, а не рэвалюцыі.
«Мы не павінны патрапіць у пастку Пуціна, паставіўшы пытанне аб расейскай агрэсіі на лязо прэзідэнцкай кампаніі. Унутраныя праблемы – барацьба з карупцыяй і рэформа судовай сістэмы павінны быць у цэнтры ўвагі», – дадаў ён.
Па дадзеных «Украінскай праўды», Вакарчук не збіраецца ісці ў прэзідэнты. Верагодней за ўсё, што яго мэта – удзел у парламенцкіх выбарах.
ІІ, belsat.eu