У Польшчы каронавірусам заразіўся міністр навакольнага асяроддзя. Правераць увесь кабінет міністраў
Улады Польшчы вырашылі праверыць на каронавірус усіх чальцоў ураду пасля атрымання станоўчых вынікаў у аднаго з міністраў. Пра гэта паведамляе PAP.
Каронавірус быў пацверджаны ў міністра навакольнага асяроддзя Міхала Вося.
«Пачуваюся добра. Дзякую працаўнікам службы здароўя ды выказваю салідарнасць з усімі хворымі», – заявіў чыноўнік.
Ён заразіўся пасля кантакту з працаўніком лясной гаспадаркі, у якога таксама пацверджаны каронавірус.
Пасля гэтага аналізы былі ўзятыя і ў астатніх чальцоў ураду Польшчы.
Адзначым, што Вось быў прызначаны на сваю пасаду толькі 5 сакавіка, або менш за 2 тыдні таму.
Паводле апошніх звестак польскага Міністэрства здароўя, у краіне пацверджаны каронавірус у 205 чалавек. 5 з іх памерлі. Апошнім стаў 57-гадовы мужчына.
МГ belsat.eu
