Анэгрэт Крамп-Карэнбаўэр абрана новым старшынёй нямецкай партыі Хрысціянска-дэмакратычны саюз. Яе кандыдатуру падтрымала большасць дэлегатаў з’езда.
За Крамп-Карэнбаўэр, якая лічыцца бліжэйшай паплечніцай Ангелы Мэркель, прагаласавалі 517 дэлегатаў (51,75%). Яе супернік Фрыдрых Мэрц атрымаў 482 галасы (48,25%)
«Мы павінны заставацца згуртаванымі дзеля мэты, якая нас усіх абʼядноўвае. Я прымаю вынікі галасавання», – адзначыла Анэгрэт Крамп-Карэнбаўэр.
Мэрц, які вярнуўся ў палітыку толькі некалькі тыдняў таму пасля шматгадовай паўзы, са свайго боку заявіў, што «працягне аказваць падтрыманне сваёй партыі».
На думку палітолагаў і экспертаў, 56-гадовая Крамп-Карэнбаўэр зʼяўляецца пратэжэ Мэркель, палітыкам, які абсалютна лаяльны дзейснаму канцлеру. Менавіта Мэркель летась паспрыяла імкліваму росту яе карʼеры – палітык была вылучана на пасаду генеральнага сакратара ХДС.
Пры гэтым Крамп-Карэнбаўэр спрабуе прадэманстраваць, што яна ніякім чынам не капіюе Мэркель.
«У мяне ўласны палітычны стыль і ўласная біяграфія. З іншага боку, я і не буду штучна дыстанцыявацца ад тых пытанняў, па якіх я падзяляю меркаванне Ангелы Мэркель», – сказала яна.
Ангела Мэркель займала пасаду старшыні ХДС на працягу апошніх 18 гадоў. Яна зʼяўляецца першай і пакуль адзінай жанчынай, якая стала канцлерам Нямеччыны. Восем гадоў запар Forbes называў Мэркель «самай уплывовай жанчынай у свеце». Пра свой сыход з пасады кіраўніка ХДС палітык абвесціла напрыканцы кастрычніка.
СК, belsat.eu
