У Цэнтральным батанічным садзе Менску 14 лютага адкрылася светлавое шоу «Фестываль гіганцкіх кітайскіх ліхтароў». Больш за 25 маштабных кампазіцый, якія складаюцца з больш за 500 фігур: жывёлы, птушкі, расліны і шматлікія іншыя істоты. Шоу – нібы сутыкненне рэальнасці і фантазіі.
Натхненнем для шоу стала традыцыйнае ў Кітаі Свята ліхтароў. Яго адзначаюць у завяршальны дзень двухтыднёвага кітайскага Новага года, які сёлета прыпадае на люты.
Па ўсім Кітаі жыхары запальваюць ліхтарыкі ў сваіх дамах, у шматлікіх рэгіёнах краіны праходзяць яркія імпрэзы, дзе можна пабачыць мастацтва ліхтароў ва ўсёй яго разнастайнасці.
У Менску «Фестываль гіганцкіх кітайскіх ліхтароў» быў створаны кітайскай кампаніяй Haitian Culture на падставе старажытных традыцый і сучасных тэхналогій.
Сталёвы каркас накрыты рознакаляровай тканінай і па-майстэрску падсвечаны знутры, дзякуючы чаму экспанаты здаюцца абсалютна бязважкімі.
Пабачыць светлавыя фігуры можна будзе да 31 сакавіка.
МГ, фота аўтара/Belsat.eu