20 снежня ў Горадні прайшлі суды над удзельнікамі акцыі супраць інтэграцыі Беларусі і Расеі, якая прайшла 15 снежня на Старым мосце. Пра гэта паведамляе журналістка Hrodna.life Алена Кавальчук.
Актывістаў Ежы Грыгенчу і Уладзіміра Арцымана судзілі паводле ч.1 арт.23.34 КаАП за парушэнне парадку арганізацыі або правядзення масавых акцыяў. Іх аштрафавалі на 255 рублёў кожнага.
Сяргею Верамеенку прысудзілі штраф у 765 рублёў, Вадзіму Саранчукову – у 637,5 рублёў. Іх асудзілі паводле ч.3 арт.23.34 КаАП за паўторнае парушэнне заканадаўства пра масавыя акцыі.
Актывісты збіраюцца абскарджваць рашэнні ў абласным судзе.
Жывы ланцуг дзеля абароны незалежнасці зладзілі гарадзенцы на Старым мосце праз Нёман 15 снежня. Каля сотні людзей з бел-чырвона-белымі сцягамі і плакатамі ўзяліся за рукі, каб выказаць адмоўнае стаўленне да аб’яднання з Расеяй.
МГ belsat.eu