Якуцкага шамана Аляксандра Габышава ўночы 19 верасня выкралі ўзброеныя людзі ў масках. Яны ўварваліся ў намёт шамана і пацягнулі яго ў аўта, пасля чаго вывезлі ў невядомым напрамку, паведаміў адзін з ягоных прыхільнікаў.
«Уварваліся, яго павалілі на зямлю. Такі вялікі натоўпам, з аўтаматамі, дручкамі. Моўчкі. Толькі Сашу шамана арыштавалі, больш нічога не было. Ніякіх дакументаў ніхто не паказваў. Гэта быў узброены захоп грамадзяніна. Ціхая спецаперацыя. Так ловяць і хапаюць злодзеяў», – дадаў відавочца.
Адзін з тых, хто суправаджаў шамана, распавёў выданню «Znak.com», што затрыманне праводзіла паліцыя.
Рэгіянальнае МУС адмовіліся каментаваць журналістам затрыманне шамана, а ў Следчым камітэце Бураціі заявілі, што не маюць дачынення да ягонага затрымання.
Журналіст Барыс Ветраў са спасылкай на ананімную крыніцу ў праваахоўных органах распавёў выданню «Сибирь. Реалии», што на Габышава завялі крымінальную справу і прызначылі псіхіятрычную экспертызу. Ёсць версія, што справу распачалі паводле артыкулу «Арганізацыя экстрэмісцкага супольнасці».
Аляксандр Габышаў выйшаў з Якуціі ўвесну і ідзе ў Маскву ўжо чатыры месяцы. Дайсці плануе за два гады.
У ліпені Габышаў сабраў масавы мітынг у Чыце, на які сабраліся больш за 700 чалавек. Галоўным лозунгам мітынгу быў «Расея без Пуціна».
9 верасня ў сталіцы Бураціі пачалася акцыя пратэсту. Тры дні людзі не сыходзілі з плошчы, нягледзячы на разгоны і затрыманні. Яны патрабавалі адмяніць вынікі выбараў мэра Улан-Удэ, а таксама вызваліць затрыманых раней прыхільнікаў шамана Аляксандра Габышава.
Паводле шамана, «Пуцін не чалавек, а дэман, і ён павінен яго выгнаць». Паводле шамана, ягоныя галоўныя метады – народныя сходы і мітынгі, але, калі гэта не дапаможа, ён гатовы ўжыць і «іншыя метады».
ДД belsat.eu
