Публіцыстка Святлана Калінкіна пракаментавала змены ва ўрадзе, якія анансаваў Аляксандр Лукашэнка.
Кіраўнік краіны загадаў сваім падначаленым унесці прапановы па зменах ва ўрадзе, у прыватнсці «па міністрах прамысловасці і будаўніцтва».
Паводле журналісткі, Лукашэнка адчувае кадравы голад, а таксама – што ягоная сістэма прызначэння міністраў не працуе.
«Кіраўнік краіны адчувае, што ўсе кадравыя рэзервы, якія яны фармавалі, гэта фармальнасць. Таму што галоўная якасць, якая патрэбная дзеля таго, каб трапіць у гэты рэзерв, – лаяльнасць да ўлады. Але я перакананая, што на самой справе нічога ён змяняць не будзе. У нас былі спробы і былі прыклады, калі сапраўды годных людзей бралі ва ўладу – нагадаю, напрыклад, пра Кірылу Рудага – але яны там проста не ўжываліся, проста там не маглі працаваць. Для таго, каб міністры былі здольныя нешта зрабіць, трэба мяняць сістэму, а не персонаў», – адзначыла Святлана Калінкіна.
На ейную думку, Лукашэнка перакананы, што дае добрыя і якасныя даручэнні:
«І ўсе гэтыя гады ён дэманстраваў свае метады: «адкручу галаву», «пасаджу», «пойдзеце прыбіраць на вуліцу» і гэтак далей. Але на самой справе, калі абсурдныя даручэнні – хоць ты топай, хоць ты хлопай, хоць ты карай, хоць ты пагражай, а выканаць іх немагчыма. Проста нагадаю, што людзі такога складу аднолькава думаюць. Вось літаральна днямі Мінабароны Расеі рассакрэціла архівы, і там загад Сталіна ў жніўні 1941 года «бамбіць Берлін». Сталін быў перакананы, што ён даў загад, і яго можна выканаць. Так і Лукашэнка жыве з адчуваннем, што ён даў загад, даручэнне, і трэба выканаць. На самой справе гэта ж, канешне, так не працуе».
13 жніўня кіраўнік Беларусі жорстка раскрытыкаваў якасць працы мясцовых органаў улады і кіраўніцтва прамысловай галіны па развіцці Аршанскага інструментальнага заводу. Ён абвінаваціў сваіх падначаленых у тым, што яны зладзілі дзеля яго паказуху.
На наступны дзень Лукашэнка абурыўся з таго, што чыноўнікі не выконваюць ягоных наўпроставых даручэнняў.
НМ, belsat.eu