У раёне горада Дэйр-эз-Зор загінуў 33-гадовы расеец Антон Дабрыгін, які ваяваў у складзе прыватнай вайсковай кампаніі «Вагнэра».
Пра гэта паведамляе валанцёрская суполка Conflict Intelligence Team, якая займаецца вывучэннем адкрытых крыніцаў.
Паводле звестак з сацыяльных сетак загінулага, раней ён быў кадравым вайскоўцам Узброеных сіл РФ (старэйшым лейтэнантам), але звольніўся (ці быў звольнены камандаваннем). Мяркуецца, што гэта адбылося праз падазрэнне ў крадзяжы.
Як пішуць знаёмыя Дабрыгіна, той загінуў, «абараняючы службовую асобу».
На гэтым тыдні агенцтва Reuters паведаміла, што толькі за апошнія 9 месяцаў у Сірыі загінуў 131 расеец.
Мінабароны Расеі ніколі не прызнавала страты сярод наймітаў з групы «Вагнэра».
Нагадаем, «ЧВК Вагнэра» – незарэгістраваная ваенная арганізацыя пад кіраўніцтвам падпалкоўніка запаса Дзмітрыя Уткіна, ён жа «Вагнэр». Група брала ўдзел у баявых дзеяннях на Данбасе (на баку сепаратыстаў) і бярэ ў Сірыі (на баку ўрада Асада). Можа фінансавацца расейскім прадпрымальнікам Яўгенам Прыгожыным. Ганарар за спецаперацыі ў байцоў складае тысячы долараў.
Сярод загінулых у Сірыі «вагнэраўцаў» ёсць і беларус – гамельчук Аляксей Ярашэвіч.
- Чытайце таксама:
«Хлопцы ваююць за пуцінскія грошы, а ФСБ іх прыкрывае». Як працуе «ЧВК Вагнэра», да якой належыў беларус Ярашэвіч
КА, belsat.eu
