Старшыня КНР, генеральны сакратар ЦК Кампартыі Кітая Сі Цзіньпін даў указанне ўраду краіны аказаць дапамогу ўсім пацярпелым ад выбуху на хімічным прадпрыемстве ў раёне Яньчэн і ўсталяваць прычыны здарэння. Пра гэта паведаміла CCTV.
«Сі Цзіньпін даў указанне ўраду правінцыі Цзянсу і кампетэнтным органам улады ўсімі сіламі ліквідаваць наступствы надзвычайнага здарэння і аказаць дапамогу, працягваць пошукава-выратавальную аперацыю, аказаць медычную дапамогу пацярпелым, правесці аднаўленчыя работы і забяспечыць сацыяльную стабільнасць», – адзначаецца ў паведамленні.
Акрамя таго, кіраўнік дзяржавы даручыў удасканаліць сістэму абвесткі пра ўзнікненне надзвычайных здарэнняў, узмацніць меры па прафілактыцы і кантролі забруджвання навакольнага асяроддзя і прыняць найстражэйшыя меры для перадухілення падобных бедстваў.
«Неабходна ў самыя кароткія тэрміны ўстанавіць прычыны здарэння і апублікаваць іх», – цытуе тэлеканал указанне Сі Цзіньпіна.
Паводле апошніх звестак, ахвярамі трагедыі сталі 47 чалавек, яшчэ 90 атрымалі цяжкія траўмы: з іх 32 пацярпелых знаходзяцца ў крытычным стане. Як паведамілі прадстаўнікі мясцовых уладаў, усяго больніцы ў раёне Яньчэн у агульнай складанасці прынялі каля 640 пацярпелых.
Выбух прагрымеў у другой палове дня 21 сакавіка на прадпрыемстве кампаніі «Цзянсу цяньцзяі» ў хімічным прамысловым парку Яньчэн. Выбух быў настолькі магутным, што сейсмалагічнае ўпраўленне краіны зафіксавала ў гэтым раёне землятрус магнітудай 3. Ударнай хваляй выбіла шыбы ў дамах, размешчаных у радыусе каля 5 кіламетраў ад месца здарэння.
Прадпрыемства кампаніі «Цзянсу цяньцзяі» займаецца вытворчасцю хімікатаў, а таксама некаторымі відамі сыравіны для хімічнай прамысловасці. Мясцовыя ўлады з 2016 па 2018 год па меншай меры шэсць разоў штрафавалі хімзавод за шматлікія парушэнні экалагічных нормаў. Агульная сума штрафаў склала 1,29 юаняў (каля 193 тысячаў долараў).
Паводле афіцыйнай заявы ўладаў, пацярпелы падчас выбуху генеральны дырэктар кампаніі Чжан Ціньюэ знаходзіцца пад вартай у шпіталі. Затрыманы яшчэ некалькі чалавек з ліку менаджменту прадпрыемства.
СК, belsat.eu
