Стужка называецца «Казахстан. Сысці нельга застацца». Нашыя рэпарцёры Аркадзь Несцярэнка і Дзяніс Дзюба паехалі на месца падзеяў, каб спраўдзіць, што змянілася ў краіне пасля таго, як шматгадовы прэзідэнт Нурсултан Назарбаеў дабравольна сышоў у адстаўку. Цяпер краінай кіруе Касым-Жамарт Такаеў, які перад гэтым узначальваў верхнюю палату парламенту, а яшчэ раней прадстаўляў краіну ў ААН.
Пераменаў жыхары Казахстану чакалі. Сярод іх – сваякі забітых у 2011-м падчас пратэстаў у Жанґаўэзене. У фільме яны распавядаюць, што ў марадзёрствах, якія пачаліся ў горадзе з-за беспарадкаў, у выніку абвінавацілі тых, каго забілі сілавікі.
Аднак Такаеў – зусім не той, каго хацелі б бачыць прэзідэнтам прыхільнікі пераменаў. Падчас пазачарговых выбараў людзі выйшлі на вуліцы: яны разумелі, што ў краіне адбываецца перадача ўлады ў рукі кандыдатуры, узгодненай з Крамлём.
Такім чынам, Назарбаеў сышоў, але застаўся. Але засталіся ў Казахстане і тыя, хто хоча пераменаў.
«Яны прынцыпова не з’язджаюць з краіны, хаця могуць (большасць вучылася за мяжой). Яны так і кажуць: мы тыя, хто рашуча засталіся», – распавядае Дзяніс Дзюба.
Праўда, іх меркаванне ўлады працягваюць ігнараваць.
«У рэпартажы мы даем слова тым, каго ўлады Казахстану не чуюць апошнія 30 год», – адзначае Аркадзь Несцярэнка.
Падчас здымкаў «Казахстану. Сысці нельга застацца» нашых рэпарцёраў пазналі працаўнікі казахскіх спецслужбаў. Аказалася, яны глядзяць «Белсат», і хлопцаў хутка адпусцілі. Чым скончыцца ў Казахстане транзіт улады, які абудзіў грамадства? І колькі пратрымаецца ва ўладзе новы прэзідэнт? Паглядзіце і вы (відэа вышэй).
ІА, belsat.eu