Кіраўніца прэс-службы кіраўніка Беларусі Наталля Эйсмант зняпраўдзіла затрыманне ў Менску на запыт ЗША грамадзянкі Расеі Ганны Багачовай. Пра гэта яна заявіла ў размове з расейскім выданнем «Подъём».
«Затрыманне не праводзілася па запыце ЗША – затрымання не было ўвогуле! Гэта абсалютна дакладная інфармацыя», – заявіла Эйсмант.
Разам з тым раней прэс-сакратар МУС Беларусі Вольга Чамаданава паведамляла, што Багачову затрымалі ў адным з гатэляў Менску, бо яна знаходзілася ў міжнародным вышуку, але пасля яе вызвалілі.
Пра затрыманне першымі паведамілі расейскія СМІ. Ганне Багачовай 31 год. Раней яна была актывісткай расейскіх нацыяналістычных арганізацыяў. Прынамсі з 2014 года працавала на расейскую «фабрыку троляў». У 2018 годзе Багачова ўвайшла ў спіс з 13 грамадзянаў Расеі, якім высунулі абвінавачанні ва ўмяшальніцтве ў амерыканскія выбары.
МГ belsat.eu