Пракуратура дапытала лекарку з Віцебску, якая заявіла, што сітуацыя з COVID-19 выходзіць з-пад кантролю
Лекарка лабараторнай дыягностыкі Віцебскага гарадскога клінічнага шпіталя хуткай медычнай дапамогі Наталля Ларыёнава распавяла на сваёй старонцы «Вконтакте» пра тое, як адбыўся яе допыт у пракуратуры.
30 сакавіка Наталля Ларыёнава апублікавала ў сацсетках пост пра тое, што сітуацыя з каронавірусам у Віцебску «пачала выходзіць з-пад кантролю». Афіцыйныя лічбы інфікаваных у Беларусі яна назвала «абсалютна міфічнымі». Пасля гэтага лекарку выклікалі ў пракуратуру. Допыт адбыўся 1 красавіка.
Як паведаміла ў сацсетках Ларыёнава, прадстаўнікі пракуратуры паводзілі сябе вельмі ветліва, яе паказанні былі запісаныя на відэа і пісьмова.
У размове з TUT.BY Наталля Ларыёнава паведаміла, што падчас допыту ў яе пацікавіліся, адкуль яна брала інфармацыю для сваёй публікацыі і на чым грунтуюцца яе высновы пра сітуацыю з каронавірусам у Віцебску і краіне. Лекарка патлумачыла, што высновы грунтуюцца на размовах з калегамі і ўласных ведах у медыцыне.
«Пад канец размовы спыталі, якія меры, па-мойму, трэба ўвесці. Я сказала: каранцін. І патлумачыла чаму», – адзначыла Ларыёнава.
Праз цяжкую сітуацыю з распаўсюдам каронавіруснай інфекцыі ў Віцебску створаны абласны штаб на чале са старшынёй аблвыканкама Мікалаем Шарстнёвым. На першы паседжанні штабу, 1 красавіка, прысутнічаў міністр аховы здароўя Уладзімір Каранік.
Раней на Віцебшчыну Аляксандр Лукашэнка накіраваў старшыню Савету Рэспублікі Нацыянальнага сходу Наталлю Качанаву.
ІІ belsat.eu
